Эн өдрмүдт танһчин театрмудын артистнр шин жилин байрт нерәдгдсн нәр-наад үзүлжәнә
Эн долан хонгт танһчин театрмудын артистнрт көдлмш дала. Бичкдүдин шин жилин нәр-наадна болн корпоративн нәр болжасн гүргүд эдн театрт көдлә бәәж, иим нәр-наад үзүлжәнә. Иим елкст актермуд дала мөнг олна гиж зәрм улс келнә. Иим тоолвр чик аль угай?
Орсин театрин нертә актер Виктор Хаптаханов шин жилин байрт артистнр яһж күнд көдлмш кедгин тускар бүкл дегтр бичж чадх. Театрт кесг жилдән көдлжәнә. Тегәд эн кемд дала юм үзв. Виктор Хаптахановин келсәр, урднь иим байрт мөнг олх арһ учрдг билә. Тиигхд мана жалв зун арслнг тогтажала. Ода болхла бидн зуг жалвин төлә иим шин жилин елкд көдлжәнәвидн.
Эн өдрмүдт орсин театрин баһ наста артистнр цугтан шин тууль тәвлһнд орлцжана. Энүг баһ наста сценаристнр Леонид Сангаджиев болн Санл Церенов үүдәв. Бичкн күүкн Киитн Аавин илгәсн белг секәд хәләжәнә. Шин жилин байр иртлд бичгә сек гисн бийнь, эн күүкн тесж чадлго посылк хәләнә. Энүнд бәәсн наадһас әмдрнә. Энүнә тускар шин туульд келгджәнә.
Гиляна Шевкеева Вингс наадһан дүр нааджана. Наадһан хувцна тускар бичкн хәләһәчнрт келж өгнә. Энүнә келсәр, бичкн күүкд ардаснь гүүһәд, йосн әмд Вингс гиж алмацж сурв. Тана үс көндәж болхий аль угай гиж сурна.
Искусствин училишин актерск әнгин сурһульч Игорь Джимбеевин келсәр, иим соньн нааднд түрүн болж орлцжана. Тегәд бичкдүдт иим соньн наад үзүлхлә, эврән чеежин сергмж авна. Тегәд нам муурсан чигн мартна. Нааджасн дүрән үнн-чик кеәвр үзүлхәр зүткв. Сурһульч Игорь Джимбеевин келсәр, мегамозг уурта болхар седнә. Болв йириндән эн дегд әәлтә, тас ур уга.
Эн өдрмүдт актермудт көдлмш дала. Долан хонгин эргцд өдртән дөврн наад үзүлжәнә. Зәрмдән нам хот уух цол күртхш. Бөдүн актермудла хамдан эднә үрдүднь бас нааднд орлцжана. Юлия Клейнерин Эля күүкнлә, бичкн Сеня, Виктор Хаптахановин көвүнь бас нааднд орлцв. Иим шуугата болн нәр-наадн болжах кемд артистнр мөнгнә тускар ухалжахш. Игорь Джимбеевин келсәр, театрт ирхлә, цуг эврәннь төрмүдин тускар мартгдна. Бичкдүдиг үзхлә, мөнгнә тускар ухан орхш гиж Игорь келнә. Тегәд артистнр шин жилин байрин өдрмүд хоосн мөнг олад көдлжәнә гиж мана танһчин артистнрин тускар келж болшго.
Колдан Наталья, Хулхачин Николай
