Эн өдрмүдт Элстд хаалһ яслһна көдлмш эклж
Элст балһсна Шахматная, Геодезистов болн Рельефная нертә уульнцсин әмтн хату девскртә хаалһ угаһар түржәлә. Сән хаалһ энд тосхгдшго гиж эдн цөкрәд бәәв. Болв ода эн туст бәәдл ясрх бәәдлтә. Эн өдрмүдт энд хаалһ яслһна көдлмш эклж. Элстин хаалһин заллтин көдләчнр автогрейдерар хаалһ ясж тегшлжәнә. Энүнә хөөн энд шебень делггдхмн.
Хаалһин заллтин көдләчнр ирәд көдлжәхин үзчкәд, Полина Мучкаева икәр байрлв. Урднь бичкн Вадим көвүтәһән автобусн зогсал күртл йовһар ик түрү үзәд күрдг бәәсмн. Нег үлү, үвл-намрин кемд йир күнд болдг билә. Полина Мучкаеван келсәр, хаалһ йир му, ода хагсу цагт егм уга, бальчг болхла йовж болхш. Балһснд асфальт уга, эннь алнг болна. Зәрм селәнә улс сән хаалһта.
Энүнлә хам-хоша бәәх Александр Зайцевин келсәр, сүл кесг жилд эдн Элст балһсна һардачнрт кесг дәкж одад, хаалһ кех дөн сурла. Болв эднд ахлачнр нөкд болсн уга бәәж. Тегәд арһ уга эдн эврәннь мөнгән өгәд, хаалһиг ясхар шиидж. Бачм чинртә медицинск дөн күргдг машин чигн нааран ирж чаддго бәәсмн гиж Александр Зайцев һундлтаһар тодлна. Зайцевин келсәр, машита улс сән, талдан әмтн яахмб? Көгшдүд түржәнә. Эмчнр нааран ирж чадхш. Экнь инвалид. Медицинск машин нааран ирхш. Тегәд арһ уга йовһар ирнә.
Сурһульчнр болхла кесг жилдән бальчгар йовад, дасж одв. Нәәмдгч классин сурһульч Алтана Бадмаеван келсәр, сән хаалһ бәәхлә резин һос хулдж авх керг уга болх. Алтана Бадмаеван келсәр, школдан адһад йовхла, му хаалһар йовхд түрү болна. Хурин хөөн энд йовж йовад унх әәмшг бәәнә. Резин һосан тәәләд, талдан башмг өмсх кергтә болна.
Маши залачнр болхла хурин хөөн эс гиж цасн орхла автомобильмудан ик хол олн давхрта гермүдин өөр үлдәчкәд, гер талан йовһар күрәд дасчкв. Зунын кемд чигн иим му хаалһар йовхд бас күнд болна. Эрднь Эльзеновин келсәр, хаалһ угаһар бәәһәд, әмтнд ик зовлнг болжана. Хаалһ кехвидн гиж ахлачнр жил болһн келнә. Ода күртл асфальт кеһәд уга.
Тер саамд Элст балсһна хаалһин заллтин көдләчнрин зәнглсәр, эн жилин октябрь сарин нег шин күртл хаалһд шебень делггдхмн. Асфальтар болхла иргч жилд бүркх зура бәәнә. Ода деерән иим үнтә көдлмш кехд хотл балһсна бюджетд мөнг уга болжана. Хаалһин заллтин прораб Александр Хулхачиевин келсәр, мэрийн хазнас мөнгн ирв. Тегәд сентябрин дундурар энд көдлмш эклв. Октябрин нег шин күртл шебень делгх зура бәәнә. Асфаль ода деерән кегдшго.Үвлин-намрин кемд эн хаалһиг хәләж ясхвидн. Цуг эн уульнцсин хаалһ ясхин төлә нег сай арслнг йилһж өггдв.
Келхд, Северная нертә уульнцд удл уга тавдгч тойгта автобусн маршрутын зогсал кегдхмн. Тегәд ода энд хаалһ хамгин түрүнд ясгджана. Эн уульнцсин бәәрн әмтн хаалһ му гиж келсн деерән, тер мет сөөднь һаза герл уга болад бас күнд болжана гиж неквр тәвжәнә.
Ээнән Ольга, Ирчин Алексей, Колдан Церн
