Элстин юннатнрин станц күнд таалд көдлжәнә
Эннь школд кегджәх көдлмш болжана. Зуг немр эрдм-сурһулин халх удл уга бичкдүдт уга болх әәмшгтә. Ода сурһулин заведеньст зерлг ангудын шуһу уга, цөн школмудт сад-һаруд үлдв. Тегәд чигн ода зуг уйн наста натуралистнрин станцд эдн одад, әмд мал-аһрус, шовуд болн өвәрц урһмл үзж чаджана.
Элст балһсна юннатнрин станц тәвн жил хооран секгдсн билә. Тиигхд мана орн-нутгин сурһульчнртер тоод хальмг танһчин бичкдүд натуралистическ кружокмудт, произволственн бригадмудт болн школьсн лесничествд негдәд, дурта эрдмәрн көдлдг бәәсмн. Иим жисәнд орлцад, көвүд-күүкд экологин халхар кергтә медрл болн дамшлт авдг билә. Тер мет йиртмжиг харсх сурһмж авдг бәәсмн.
Өдгә цагт Элст балһсна уйн наста натуралистнрин станц экологическ сурһмжлһна болн сурһулин йоста цутхлнг болжана. Энүнд һурвдгч-тавдгч классмудын сурһульчнр өвәрц урһмл үзсн, шовуд, мал аһрусла таньлдсн деерән, эдниг асрад хәләж чаджана. Методист Лариса Ованован келсәр, бәәрн дендрайид дөчн һурвн зүсн модн болн шагшгуд бәәнә. Энүнәс арвн долань өөшк цецгүдин тохма урһмл.
Сурһульчнрин эколого-биологическ танһчин цутхлнгин методист Лариса Ованован келсәр, энд авсн медрл сурһульчнрт школд биологин болн ботаникин кичәлд кергтә болна. Школд иим медрл өгхш. Энд болхла бичкдүд эврәннь нүдәрн шовуд, урһмл үзнә.
Тер мет цутхлнгд өвәрц хвойн урһа модд бас бәәнә. Бәәрн дендрарий спонсормудын дөнгәр секгдв. Бюджетн мөнгн болхла уг жалвд болн мал-аһрусна хотд күрнә. Зәрмдән внебюджетн чигн мөнгн орж ирнә. Хавр-зунын кемд тәрә темс хулдад, эдн мөнг шингәнә. Зуг эн мөнгнә кемжән бичкн.
Материальн-техническ ул энд му болв чигн, ода эколого-биологическ цутхлнгд һурвдчг-тавгдч болн арвн негдгч классмудын зун сурһульч оржана. Энд мөнг авлго биологин предметар ЕГЭ-н шүүврт белдвр кенә. Юннатнрин станцин шунмһа болн седвәрч көдләчнрин нилчәр, энд олн-зүсн марһас, экологин конфыеренцс болн экологическ керг-үүлдврмүд бүрдәгднә. Одахн станцд уйн наста эргндк йиртмж шинжләчнрин танһчин конференц болв.
Сурһульчнрин эколого-биологическ цутхлнгин директор Кермн Окаеван келсәр, ода иим цутхлнгд ботаническ сад кергтә, талдан чигн ан-аһрусна шуһу бүрдәхлә сән болх. Сәәхн дуута шовуд бәрх кергтә. Ода зуг тоть шовун бәәнә.
Өдгә цагт уйн наста натуралистнрин станцин көдлмшин чинр сольжана. Болв иим жисәнә һол күцлнь сольгдхш. Бичкдүдт байр үүдәж, эргндк йиртмж сәәнәр медхд иим цутхлнг сән нилчән күргжәнә.
Татьяна Дмитриева, Хулхачин Николай
