Элстин сурһульч нарта-делкән марһанд диилвр бәрв
Элст балһсна сурһульч Арина Самаева нарта-делкән марһанд диилвр бәрв. Иим дөрлдәг Возрождение и надежда нертә буйнч седклин санг бүрдәж давулв. Энүнд орлцачнр олн-зүсн халхар билг-эрдмән үзүлж дөрлдв. Хальмгин элчин бичсн цаһан шүлгүд жюрин оньг авлад, өөднәр үнлгдв.
Эврәннь нәәж күүктәһән яһж күүндхмб? Уйн наста Элст балһсна сурһульч Арина Самаеван тоолврар, иим күүндвриг цаһан шүлгәр дамжулж кеж болх.
Дәкәд болхла бичкн күүкн келврмүд бичнә. Энүнә тоолврар, цуг тоотыг үгәр дамжулж медүлж болна. Уйн наста бичәч кесгтән гүн уха туһасна хөөн эврән сәәнәр меддг юмна тускар бичнә. Энүнә билгиг "Вера, надежда, любовь" нертә нарта-делкән фестиваль марһана жюри өөдән үнлв. Аштнь мана танһчин элч диилвр бәрв. Иим сән үзмж бәрснд Альтаир нертә крестьянск-фермерск эдл-ахун толһач Александр Чудитов болв Элст балһсна бәәрн күүкд күн Ольга Церенова күүкнд дөн болв. Арина ик билгтә күүкн гиж эдн иткәд, хол һазрт йовхд нөкд болж. Күүкнь бичкн цагас авн үүдәлтд дуран өглә гиж экнь тоолжана. Бичкн цагас авн инвалид болсн бийнь, талдан бичкдүдлә әдл медрл авад, ухан орад, делгрлт авч. Иим ик чинртә марһанд орлцсн ил герч болжана. Аринан эк Елена Самаеван келсәр, марһанд Әрәсән дөчн хойр региона эчлнр ирж орлцв. Ик байрта бәәнә. Арина Самаеван келсәр, марһанд эврән иим сән үзмж бәрж чадв. Түрүн орм эзлх гиж санжасн уга бәәж. Иим сән кевәр келврмүд бичсн тускар меджәсн уга билә.
Эндр Аринаг хамдан сурчасн көвүд-күүкд болн багшнр йөрәв. Ода күүкн Элстин арвн доладгч школын доладгч класст сурчана. Иим ик диилвр бәрснд байрлад, йөрәжәнәвидн. Мана класст иим билгтә күүкнь сурчахнь бахмж болжана. Иргчдән бас диилвр бәрхинь дурджанавидн.
Литературин багш Любовь Викторовна Мединцеван тоолврар, нег дәкж шүлглән ямаран чеежин сергмж өгдгин туска.р медж авсн Арина иргчдән шүлгч эс болсн бийнь, үүдәлтән хайшго. Энүнлә хамдан сурчах көвүд-күүкд иим сән үзмж бәрсн Аринаһар бахмж кеж байрлжана. Эднә зәрмнь Аринан үүдәлтин тускар урднь меджәсн уга бәәж. Өсхләрн эрк биж журналистын эрдм дасхин төлә Москван государственн университетд орж сурх саната. Давсн марһанд күүкн эврәннь билг-эрдмән дәкәд нег иткүлж, олн улст медүлв. Эннь йир сән эклц болжана. Иргчдән ямаран кеәвр билгнь делгрхин тускар зуг Арина эврән медх.
Харлун Бадма, Колдан Церн, Котина Валерий
