Элстин нег уульнцин әмтн усн угаһар зовжана
Элст балһсна цутхлнгд бәәсн бийнь, бәәцин таал уга бәәнә. Энүнә тускар Элстин уульнцин бәәрн әмтн келнә. Эднә уульнцд хату девскртә хаалһ уга, уудг усн иржәхш. Хотл балһсна һардачнрт эдн зовлнган медүлсн билә. Зуг эднә төр ода күртл халһгдад уга.
Мария Ильинична ода найн тавн наста, күч-көлснә ветеран, инвалид. Өдр болһн гилтә магазинд күртл йовхд күнд болна. Нег үлү, тендәс хәрж ирх кергтә. Уульнцар йовж болжахш, бальчг, нүкн ик боомтг болжана. Хур-цасн орхла нааран бачм чинртә медицинск дөн күрдг машин, такси ирж чадхш гиж көгшә зовлнгарн хувалцв.
Эврәннь зовлнган бәәрн уульнцин әмтн кесг дәкж хотл балһсна һардачнрт медүлсн билә. Болв эднә төриг күн хаһлжахш. Элст балһсна бюджетас асфальтн хаалһ татхин төлә мөнг йилһж өгх арһ уга болжана. Энүг зуг бәәрн улсин мөнгәр болн бюджетин мөнгәр тосхж болх. Болв эн уульнцин бәәрн әмтн талдан чигн төрәр хотл балсһна ахлачнрт келсн бәәж. Энд татгдсн усна сурвлжн хуучрад эвдрж одв. Дару-дарунь турваһас усн һоожад гермүдт, подвалмудт болн пөөгрт орна. Пенсионерк Таисия Колесникован келсәр, өцклдүр бүкл өдртән усн уга бәәж. Хуучрад зеврж одсн турва дару-дарунь эвдрнә. Таисия Колесникован келсәр, турва эвдрхлә, ус сорж авна. Герт усн орхла, ик зовлнг болна. Ода хәләтн ус сорж авч.
Бәәрн әмтнә гермүдт ус орулдг худгин ормд ода бүркәсн уга нүкн тогтв. Нүкнд бичкдүд унх әәмшг бәәнә гиж күүкд улс келнә. Эн төрәр кесг дәкж Элстин мэрийд бичг бичсн бәәж. Ода эдн цөкрәд, альдас дөн күләхән меджәхш. Колесникован келсәр, энд одахн шавр асхад, һазр өрглә. Ода болхла эннь уга болж одв. Эн күүкд күүнә келсәр, усн гүүһәд, хойр гер авлв. Балһсна ахлачнр тас нөкд болжахш.
Тер саамд «Элиставодоканалын» тоолврар, Лермонтовин проезд аварийн уульнц гиж тоолгджахш. Ах инженер Павел Убушаевин келсәр, иим уульнц хотл балһснд олн. Ясврин көдлмшиг предприятьмудын мөнгәр кех кергтә болна, хотл балһсна хазнд мөнгн уга. Ах инженер Павел Убушаевин келсәр, усна сурвлжн өндр һазрт бәәнә. Техник нааран ирж чаджахш. Тегәд һарар көдлх кергтә болна. Эн жилин хойрдгч өрәлд зәрм һазрт усна сурвлж сольх зура бәәнә.
Бәәрн уульнцин әмтн хара суух санан уга. Эдн федеральн йоснас дөн сурх зурата. Бичг бичлго, зуг улан чирәһәрн харһад күүндх саната. Усн уга, хаалһ му — цуг эн дуту-дундсиг тесж бәәдг арһ уга болжана.
Ээнән Ольга, Очра Сергей
