Элстин болн Хальмг танһчин епископ Зиновий төрж менлсн өдрән темдглжәнә
Эндр Элстин болн Хальмгин епископ Зиновий эврәннь харул-хааһул болгч әрүн Зиновийн, Эгейск епископин өдр темдглжәнә. Эн байрин өдрт нерәдж Элст балһсна Казанск кафедральн чонжд ик мөргүл болв. Энүнә өмн өдр епископ Зиновий һардврта епархиальн хург болв. Энүнд отец Зиновий күсдундур жилд владыкан цолд ямаран көдлмш күцәснә тускар болн иргч үүлдврин зуран тускар күүндвр болв.
Епархиальн хургин сүүр хуучн чонжд Элст балһсна Крестовоздвиженск чонжд болв. Энүнд приходск чонжсин толһачнр болн клирикмуд, епархиальн әнгсин ахлачнр болн көдләчнр, воскресн школмудын һардачнр орлцв. Хамгин түрүнд эдн владыка Зиновийг төрж мендлснә өдрлә йөрәв.
Епископ Зиновий Элстин болн хальмгин епархийг күсдундур жилдән һарджана. Эн цагин эргцд кеж-күцәсн керг дала. Энүнә дөнгәр танючин райодт шин чонжс тосгджана, Хальмгин һол чонж Казанск кафедарльн чонж шинрүлгдж ясгдв. чонжин дотрк ке-сәәхн зургудар кеерүлгдв, шин алтарь тәвгдв. Октябрьск района толһач Владимир Цыбулин бас хургин сүүрт орлцад, дөн-тус күргсн төләд владыка Зиновийд ханлтан өргв.
Октябрьск района депутатрин хургин ахлач Владимир Цыбулина келсәр, түрүн болж епискок Зиновийг үзәд, таньлдсна хөөн, эн күн таасгдв. Цаһан седклтә бол ухата күн гиж сангдв. Октябрьск районд ирхинь күләжәнә.
Владыка Зиновий болхла эврәннь үүлдврән һольшг кевәр үнлжәнә.Өөрхн иргчд кех-күцәх көдлмш дала гиж эн тоолжана. Хальмг танһчд урднь көдлжәсн архиепископ Зосиман православн зангшал батрулһна үүлдвриг цаарандан күцәж делгрүлх кергтә болжана. Хальмгт шин чонжс болн ик шин чонж тосхсн деерән, иргчдән духовн училиш секх зура бәәнә. Онц келхд, Элст балһснд шин чонж бәрх седвәриг Хальмг танһчин толһач дөннв.
Элстин болн Хальмгин епископ Зиновий келсәр, Хальмг танһчд әмтн хоорндан ни-негн бәәхинь тускар санх кергтә. Энүнә төлә шагшавдын сурһмж баһчудт өгх кергтә, шажна чинриг өөдлүлх төр тәвгджәнә.
Энүнә темдглсәр, номин шинжлт болн көгжмин халхар үүлдвр күцәхд цаг күртхш. Келхд, отец Зиновий эрдм-сурһулин номин нарта-делкән академин член-корреспондент. Тер бийнь номин халхар болн көгжмчнрт дөн кергтә болхла епископ Зиновйи нөкд болхан медүлв. Күсдундур жилин туршарт православн шажнд шүттг әмтн эврәннь владыкад ижлдәд, йир икәр күндлдг болв. Өдр болһн гилтә отец Зиновий чонжин һаза олн улста харһад күүнднә.
Ангелина келсәр, отец Зиновий һольшг зангта, төвшүн күн. Оньдин эгл улст дөн күргнә. Танһчин православн әмтн энүг икәр күндлжәнә.
Татьяна Дмитриева, Хулхачин Николай
