Элстд олн давхрта герт хуучн гермүдәс әмтн нүүж орх

Элст балһснд Калачинская нертә уульнцд тосхгджах шин гер темдглсн болзгар бәргджәнә. Тосхлтын йовуд бүртксн специалистнр иим аш кев. Ода тосхачнр хойр корпуст дегц һурвдгч давхр экләд босхжана. Олн давхрта шин герт хуучн гермүдәс өрк-бүлмүд нүүж орх.

Олн давхрта гериг сән чинртәһәр темдглсн болзгт эдлврт орулхар шунжана. Иим даалһвр тосхачнрин өмн зөгсжана. Тегәд чигон көдләчнр өрүн эртәс авн асхн ора күртл көдлжәнә. Тоосх, элсн, цемент болн талдан чигн тосхлтын материалмулд нааран цаглань авч ирнә. Эннь тосхлһна көдлмшин неквр болжана. Ода тосхлтын плошадкд һурвдгч давхр тосхгджана. Тер мет монолитн ора кегджәнә, энүнлә дегц терз углж тәвгджәнә.

Прораб Санл Авалдаевин келсәр, ода хойрдгч давхрт тоосх күцц тәвгдв. Энүнлә зерг тосхлтын монтажн көдлмш кежәнә, негдгч давхрт шалдарин көдлмш кегджәнә. Монолитн конструкц лабораторн шинжлтд орна. Долан хонг болад иим көдлмш кегднә.

Заказчикин өгсн даалһвр болн некврмүд темдглсн толзгт күцәгджәнә. Шин обьектд ут-тоодан зун дөнч хойр сай арслнг йилһж өггдв. Калачинская нертә уульнцд тосхгджах гер хойр халхас мөнгәр теткгджәнә. Дөчн нәмән сай арслнг ЖКХ-н халх шинрүлһнә сангас ирв, Элст балһсна хазнас хөрн сай арслнг йилһж өггдв, Тер мет далн сай арслнг мөнгн нег дөрвлжн метрин үн данцахин төлә һарһж өггдсмн. Әрәсән региональн делгрлтин министерствин тогтасар эн кемжән арвн йисн минһн зун тәвн арлснг күрчәнә. Хальмг танһчд болхла эн кемжән хөрн долан минһн арслнг тогтажана. Шин герт патьрмуд иим кевәр хуваж өггдх. Кемр өрк-бүл урднь хойр хората патьрт бәәсн болхла, энүнд бас иим аһута патьр өггдх зөвтә.

ДЕЗ заллтин директор Санл Долановин келсәр, шин герин патьрмуд хувасн цагт федеральн закаһар комиссин сүүр болх. Урднь өрк-бүл бәәсн патьрин аһула ирлцәтә патьр шин герт өггдх. Кемр дөчн дөрвлжн метр бәәсн болхла иим аһу өггдх зөвтә.

Олн давхрта шин герт Ленина болн Клыковин нертә уульнцд хучн гермүдт бәәршлжәх өрк-бүлмүд нүүж орх. Тосхачнрин келсәр, эдн өдр болһн нааран ирәд, тосхлтын көдлмш бүрткж хәләнә. Өдр ирвәс шин герин дүрснь соляд, кесг цагтан күләжәсн гер удл уга эдлврт орх. Эн өдрмүдт тосхачнр дәкәд нег селгәһәр көдлхәр шиидв. Юнгад гихлә олн давхрта гер хойр сар болда эдлврт орулгдх зөвтә.

ДЕЗ-ин заллтин директор Санл Долановин келсәр, шин герин өөр темдглсн зураһар бичкдүдин плошадк тосхгдх, хату девскртә хаалһ делггдх, урһмл модн суулһгдх, һаза герл орулгдх. Ахрар келхд, герин эргндк аһу кеерүлгдхмн.

Субподрядн организацин элчнрин келсәр, тавн давхрта герин конструкц йир күнд болн жанһрта. Эннь геометрическ янзта болад, энүнд тосхачнр немр көдлмш кежәнә, немр тосхачнр кергтә болна. Аштнь шин гер хотл балһсна талдан гермүдәс өвәрц архитектурарн йилһрхмн.

Ээнән Ольга, Котина Валерий