Элстд Махмуд Аккочкаровин санлд нерәдгдсн самбр байрин бәәдлд секгдв
Энүнә нерн мөнкинд үлдх. Элст балһснд дәәнә болн күч-көлснә ветеран Махмуд Аккочкаровин санлд нерәдгдсн самбр байрин бәәдлд секгдв. Эн күн танһчин финансин систем бүрдәлһнә ул тогтасмн. Эн халх делгрүлһнә төлә чидлән нөөлго олн жилдән көдлсмн. Махмуд Аккочкаров гүн медрлтә, байн дамшлтта болн һольшг зангта күн билә гиж митингд цуглрсн әмтн келнә.
Митингд орлцсн улсин тодлсар, Махмуд Аккочкаров Хальмг танһчд тәвдгч жилмүдт ирв. Тер цагт хальмгуд Сиврәс ирсн хөөн танһчан босхж авчасн күнд цаг бәәсмн. Финансин әнгд түрүн авгтан көдлв. Хөөннь эн әнгәс министерств тогтагдв. Шин ведомствд дамшлтта специалистнр ик чинртә көдлмш күцәдг билә. Эднә тоод Махмуд Аккочкаров йовна. Энүнә өмн Москван государственн университетд сурв, Ставропольск крайд сурсн эрдмәр көдлсн билә. Тегәд чигн Махмуд Зарифханович финансин министрин дарук күртл өсәд, эн цолд арвн долан жилдән чидлән нөөлго көдлсмн.
Дәкәд болхла Махмуд Аккочкаров догшн дәәнә һалд орв. Төрскн һазран, эврәннь улсан харсад кесг дуунад йовж дәәлдсмн. Зәрмдән үклин өмн өргнәс гетлж һарх саам учрдг билә. Баатр-зөрмг кевәр дәәлдсн төлә олн-зүсн государственн ачлврмудар ачлгдв. Финансин министерствин музейд Махмуд Аккочкаровд нерәдгдсн экспозиц бәәнә. Энүнә күүкдиннь тодлсар, дәәнә тускар эцкнь дала үг келдго бәәж. Сталинград балһс харслһна дәәлдәнд, Европин аһуд дәәлдж йовсн тускар болн Японьла болсн дәәнд орлцсна тускар күүкднь хамдан дәәлдж йовсн улсин бичгәс медж авв. Энүнә күүкн Гульфери Аккочкарован келсәр, бидн өрк-бүлмүдәрн иньглдг биләвидн. Мадниг баһ насн, дән, иньглт болн әәмшг негдүлдг бәәсмн.
Дәәнә хөөн фронтовикүд төрскн селәд-балһсдан босхж авла. Заагтнь сурһуль дасдг бәәсмн. Махмуд Зарифханович сурһульд йир дурта билә. Москва балһсн таасгдв. Хамдан сурчасн көвүд-күүкдлә театрмудт, музейд болн библиотект оддг бәәж. Тенд эдн хамдан дәәлдж йовсн улсла харһлт кедг билә. Иим харһлтс Диилврин байрин өмн өргнд болдг бәәж.
Хальмг танһчд энүнд энкр төрскн һазр болв. Энүнә босхмжд байрлдг билә. Иим көдлмшт Махмуд Аккочкаровин ик тәвц бас бәәнә.
Элст балһсна Осипенкон нертә уульнцин герт Махмуд Аккочкаров сүл өдр күртлән бәәв. Ода энүнә үйнр санлын самбр углж тәвәд, зөрмг дәәчин болн медрлтә көдләчин санлынь мөнкрүлв.
Чучян Валентина, Очра Сергей
