Элстд баһчудын бииһин соньн фестиваль болв

Элст балһснд “Точка опоры” нертә уульнцд би биилдг баһчудын нәәмдгч региональн фестиваль болв. Энүнд Элст балһсна, Аһшин, Ставрополин, Әәдрхнә болн Ростов на дөну балһсдын элчнр орлцв.

Иим фестиваль болһн ямаран чигн брейкас болн хип-хоп бииһәр эклнә. Ода нег сценд хойр команд дииләчән йилһжәнә. Эдн чеерүдәр брейк-дансин хамгин күнд эв-арһ үзүлжәнә. Онц келхд, иим олн акробатическ эв-арһ талдан баһчудын биид уга.

Иим биииг баһчуд тәвн секундас үлү биилхш. Уульнцд биилдг көвүд-күүкдин һол зокалнь — нег чигн секундт зогслго, бииләд, олн әмтиг үүмүлж байрлүлх кергтә болжана. Эн көвүнә келсәр, иим би йир таасгдна. Эн күүкдин келсәр, болхла эврәннь бииһән сәәнәр билж чадв. Зәрмнь товчлгч марһанд орв. Ставропол балһснас ирсн баһчуд сәәнәр биилв. Эдн маднас ах наста гиж күүкд келнә.

Брейк данс биилдг баһчуд һар, толһа деерән зогсх зөвтә. Болв эннь хамгин бичкн эв-арһ болжана. Түрүн болж иим би Америкд биилж. Фестивалин йовудт брейк болн хип-хоп баһчуд үзүлсн деерән, баскетбольн мячта фристайл үзүлв, электрик буги шоула олн улсиг таньлдулв. Иим марһа жюрид үнлхд күнд болад бәәв. Юнгад гихлә фестивальд орлцсн баһчуд, тер тоод Әәдрхн болн Ростов-на-Дону балһсдас ирсн көвүд-күүкд эврә онц эвр-эрһар күнд би биилж өгв. Әәдрхн балһсна элч, жюрин гешүн Григорий Захарян келсәр, Ставрополяс ирсн көвүд-күүкд сән белдвр үзүлв. Эдн Әрәсән талдан регионмудт одад, билг-эрдмән үзүлсн бәәж. Эднә тускар оддуд гиж келж болх. Элстихн бас сән би үзүлв. Нааран ирәд дамшлтарн хувалцж. Эднд цаарандан күцәмж бәрхинҗ дурджанав. Эдн сән үзмж бәрх зөвтә.

Иим би шинкн экләд биилжәх улст иим марһан сән дамшлт өгв. Фестивалин йовудт эдн талдан регионмудын болн танһчин баһчудла таньлдж чадв. Эврәннь билг-эрдмән үзүлж чадв. Дөрлдәнә орлцачнрин келсәр, иим бииһин марһанд шүүгдхлә һундлта биш, хамгин һол күцлнь — эврән бииһән үзүлснь сән керг болв.

Санкун Кермн, Бадмаран Владислав