Элст балһснд сунһврин зөвин төрмүдәр болсн танһчин олимпиад төгсв
Элст балһснд сунһврин зөвин төрмүдәр болсн танһчин олимпиад төгсв. Энүг танһчин сунһлһна комиссь болн Хальмгин эрдм-сурһулин, номин болн сойлын министерств бүрдәж давулв. Марһана дииләч Хальмг танһчин нериг цугәрәсән марһанд харсх зөв авв.
Олимпиадын орлцачнрин компьютерин эв-арһар сурлһ келһнә тускар болн шинжлтән харслһна көдлмшин ашиг марһана комиссь кесг цагтан шинжлж хәләв. Иим керг-үүлдвр тавн жилдән бүрдәж давулгдсн бийнь, жил болһн шин эв-арһ орулгдна, эн халхар олн-зүсн сольвр орулгдна.
Танһчин сурһульчнр дунд сунһлһна туск закана төрәр болсн марһана арвн һрвн хамгин сән бичкдүд олимпиадын товчлгч девснгд орв. Хальмг танһчин сунһлһна комиссин ахлач Александр Дикаловин келсәр, марһанд орлцсн сурһульчнр сунһлһна зөв болн зака сәәнәр меддгән үзүлв. Александр Дикаловин келсәр, сунһлһна зөв болн закана тускар көвүд-күүкд сән медрл үзүлв, жил ирәвс эднә медрл сән болна. Нег үлү, эдн эн төрәр эврәннь ухан-тоолврарн медүлж, селвгүд орулна.
Марһана аш диглсн цагт дииләчиг йилһхд күнд болв. Тер бийнь бичкддүин хоршасн балл тоолж һарһхла, дииләч йилһрв. Эн жил Лаганск олн халхта гимназин арвн негдгч классин сурһульч Саглр Анханова түрүн орм эзлв. Эн күүкн хойр жил дарандан диилвр бәржәнә.
Диилвр бәрсн күүкнд негдгч девснгин диплом болн мөнгнә мөрә байрин бәәдлд бәрүлж өггдв. Иргчдән эн халхин эрдм шүүж авх саната. Ода Саглр юридическ эрдм дасхар тохнятта белдвр кежәнә. Эн жил марһанд йилһән сән белдвр кев, нег үлү эн өдрмүдт Саглр төрсн өдрән темдглв. Сунһлһна зөвин төрмүдәр болсн танһчин олимпиадын дииләч Саглр Анханован келсәр, интернетын дөнгәр дууһан өглһнә төрә шинжлт кев. Эн төр йир сонбн болж медгдв. Иргчдән иим эв-арһар дууһан өгч болх. Лаганск сунһлһна комиссин ахлач Екатерина Муджикован келсәр, школд сунһлһна зөвин предмет орулхла сән болх. Ода көвүд-күүкд эн төриг сәәнәр меддг болв. Электронн эв-арһар дууһан өглһн баһдоньн болна.
Марһанд орлцсн көвүд-күүкд медрлән эврәннь көдлмштән олзлсн деерән, өсхләрн эн халхар мана танһчд тус күргж чадх.
Хавтхна Элла, Хулхачин Николай
