Элст балһснд каратэн секәтә марһан болв

Элст балһснд каратэ-до сетокан эв-арһар бөк бәрлдлһнә секәтә танһчин марһан болв. Эн дөрлдән цергә даалһвран күцәж йовад әмнәсн хаһцсн хальмг танһчин МВД-н көдләчнр Баснг Акугиновин болн Сергей Манкаевин санлд нерәдгдв. Энүнд нәәмн наснас авн арвн тавн нас күртл уйн наста бөкнр орлцв. Иим керг-үүлдвр бичкдүдт төрскнч сурһмж өгнә. Дөрлдә хәләх үрвр әмнәсн хаһцсн полицин көдләчнрин элгн-саднд, МВД-н ветеранмудт кегдв.

Хөв йосна органмудын элчнр эврәннь цергә нәәжнрин санлын тодлж, бичкдүдин марһа бүрдәж давулв. Түрүләд Хальмгин полицин көдләчнр болн художественн гимнастикин федерацин сурһульчнр эврә билг-эрдмән үзүлв. Онц темдглхд, иим марһан хойр жил дарандан давулгджана. Тер бийнь эн дөрлдән уйн наста каратистнр дунд ик чинр зүүж, дурта керг-үүлдвр болв. Хальмг танһчин дотр-дундын кергүдин министр Баатр Гиндеевин келсәр, эн санлын марһана һол күцлнь — әмнәсн хаһцсн нәәжнрән мартлго тодлжахан медүлжәнәвиднә, тер мет дорас өсж йовх баһчудт төрскнч сурһжм өгсн деер, бичкдүд оданас авн цогц-махмудан батрулжана, чанһ-чиирг залус болж өсх.

Ут-тоодан марһанд тәвн көвүд-күүкд дииләчән йилһв. Цергә даалһвран күцәж йовад әмнәсн хаһцсн милицин көдләчнрин элгн-саднь бичкдүдт сән үзмж бәрхинь дурдв. Эднә келсәр, бичкддүт марһанд сән үзмж бәрхинь дурджанавидн. Иргчдән иим сән спорт хайлго, цаарандан дашмлт хоршаһад, танһчин нер холд туурулхинь дурджанавидн.

Онц темдглхд, цергә даалһвран күцәж йовад, әмнәсн хаһцсн хальмгин милиционермуд Баснг Акугинов болн Сергей баатр-зөрмг кевәр Ар Кавказкд дәәлдсн төләд, Әрәсән МВД-н көдләчнрин спискд мөнкинд орулгдв. Диилвр бәрсн көвүд-күүкд эврәннь күцәмжән әмнәсн хацсн баатрмудт нерәдв. Каратэ-до сетокана хойрдгч секәтә марһанд түрүн орм эзлсн бөкнр болн призермуд күндлһнә һашгудар болн үнтә белгүдәр ачлгдв.

Бевина Мергн, Бадмаран Владислав