ЕДДС нег жил хооран тогтагдв

Кемр маднд дөн кергтә болхла бидн 112 тойгта телефоһар жиннүлнәвидн. Хальмг танһчд негдсн дежурн диспетчерск церглт дигтә жил хооран бүрдәгдв. Иим ахр цагин болзгт церглт олз-тустаһан медүлв. Бачм чинртә цуг церглтсин хамцу керг-үүлдвр ахр болзгт әмтнд нөкд болхд туслжана.

Элст балһсна улст иим церглт эрк биш кергтә гиж хотл балһсна негдсн дежурн диспетчесрк церглтин түрүн жилин аш үзүлв. Һазадын ордудт 911 тогйта телефоһар жиннүләд дөн сурж болх. Иим церглт бачм чинртә бәәдлд болн улст оперативн зәнг тархалһнд ик тәвцән орулжана.

112 тойгта телефо орулсн хөөн негдсн дежурн диспетчесрк церглтин көдлмш шин сән чинртә девснгд орв гиж энүнә һардач Александр Каманджаев келнә. 112 телефоһар күн болһн жиннүләд нөкд сурж чадх. Ода церглтд арвн хйор күн көдлжәнә. Залврин пунктд өдр болһн өдр-сө уга һурвн күн көдлнә. Энүнә ханьд диспетчер-психолог бас оржана.

Церглтин һардач Александр Каманджаевин келсәр, хамцу керг-үүлдврин ашт зака эвдсн йовдлмуд гетлүлгдв. Тер тоодж зака эвдсн улсиг ахр болзгт бәрж авв, хаалһд зеткртә йовдлд һарһсн улст дөн күрггдв. Цуг эн көдлмш ахр болзгт хамцу кевәр кегдв.

Нег телефоһар жиннүләд, бачм чинртә оперативн церглт дуудж авлһн диспетчермудт ахр болзгт кергтә шиивдр авхд туслна. Тегәд чигн бачм чинртә болн харслһна әнгс ахр болзгт дөн күргхәр һарч йовна. Шин церглтд танһчин әмтн иткүжәхин тускар диглсн аш медүлв. Нег жилд нааран арвн йисн минһн күн жиннүлв.

Негдсг дежурн диспетчерск церглтин диспетчер Мергн Зулаевин келсәр, одахн федеральн хаалһд зеткртә йовдл учрв. Мотоцикл залж йовсн күүг машин цокж. Мотоциклист дор ормдан өнгрв. Энүнә тускар бидн ГИБДД-н көдләчнрт болн бачм чинртә медицинск дөн күргдг церглтд зәнглв.

Онц келхд, танһчин марһана ашар Элст балһсна негдсн дежурн диспетчерск церглт түрүн орм эзләд, хамгин сән церглтин нер зүүв.

Ээнән Делгр, Очра Сергей