Дошкольн учрежденьст чеерүд баһржана
Элст балһснд дошкольн учрежденьст чеерүдин төриг немр багмуд секәд хаһлжана. Тер мет хотл балһснд ода Ипподромная болн Шапшукован нертә уульнцд хойр шин бичкдүдин садын гермүд тосхгджана. Энүнд ирлцнһү дараһар зун зөрн болн хойр зун арвн тавн көвүн-күүкн орж чадх. Элст балһсна арвн зурһадгч тойгта келн-улсин бичкдүдин садын гер шинрүлж ясгджана.
Элст балһсна келн-улсин бичкдүдин садт йисн баг көдлжәнә. Энүнә һурвн зун көвүн-күүкн оржана. Декабрин чилгчәр энүнд һучн бичкдүд орх немр баг секх зурата. Тер мет хөрн көвүн-күүкн ода үүлджәх багмудт орх. Энүнә төлә дошкольн учрежденьд садын гер шинрүлж яслһна көдлмш кегджәнә. Энүнә хойр корпусиг дулан хора залһлдулх зөвтә. Тер мет энүнд хойр шин ик зал секгдх.
Танһчин бюджетас дошкольн учрежденьс тосхлһна болн шинрүлж яслһна төлә зун нәәмн дундур сай арслнг йилһж өггдв, зун һучн нәәмн сай арслнг муниципальн хазнас ирв. Эндр өдрт Элтс балһснд ут-тоодан бичкдүдин садмут тавн зун немр орм секгдв.
Хотл балһсна администрацин эрдм-сурһулин заллтин әнгин ахлач Наталья Бютцинован келсәр, ода хөрн доладгч тойгта бичкдүдин садт шинрүлһнә көдлмш төгсжәнә, хөрн һурвдгч школд немр тәвн орм һарх, эн жилин чилгч күртл тавн зун далн тавн немр орм секх көдлмш кегдх. Муниципальн учрежденьст дөрвн зун найн тавн омр секгдх. Һурвн дундур сай арслнгар дошкольн учрежденьст мебель хулдж авгдх.
Ипподромная нертә уульнцд шин дошкольн учрежденя тосхлт удл уга төгсх. Энүг декабрин чилгчәр эдлврт орулх зура билә. Болв тенгрин бәәдлин таалас көлтә энүнә болзг хооран саагджана гиж тосхлытн заллтин директор Мергн Домбринов келнә.
Шин садт зурһан баг көдлх. Мергн Домбриновин келсәр, шин садт бассейн көдлх, ода энд плитк тәвгджәнә. Көвүд-күүкд хувцан сольх хора бәәнә.
Эндр өдрт нааран цуг коммуникц татгдв, уд луга дула өглһнә систем көдлх. Энүнә хөөн шалдарин болн ширдлһнә көдлмш күцәгдх. Түүмрәс саглулһна төлә давхр болһнд шишлнг оборудовань бәәнә. Шин бичкдүдин садын гер бәрхин төлә зун һурвн дундур сай арслнг йилһж өггдв. Эндр өдрт энүнәс йирнь процентнь олзлгдв.
“Калмэлектросетьстрой” ниицәнә прораб Андрей Болдыревин келсәр, энүнд ик медицинск болк тосхгдх, хойр палат бәәнә, эмчин хора болн талдан чигн эмнүлһнә кабинетмуд көдлхмн. Хот кедг һазр, хувц-хунр уһадг хора бас бәәнә.
Хойр давхрта шин герт актов зал бәәнә. Энүнә аһунь зун хөрн дөрвлжн метр тогтах. Энүнд өдгә цагин оборудовань углж тәвгдх, шин мебель хулдж авгдв. Иргч жилд шин бичкдүдин садт зун хөрн көвүн-күүкн орж чадхмн.
Баира Петрова, Эрнжәнә Эрднь
