Дорд үзгин эв-арһар бөк бәрлдлһнә фестиваль болв
Концертн залд цергә эрдмин сән зангшалд тохрсн зурһадгч фестиваль болв. Энүнд арвн дөрвн спортивн федерацин элчнр орлцх. Иим керг-үүлдвр эн жили көдлмшин аш диглһн болв. Давжах жилд спортсменмүд ямаран дамшлт хоршасан үзүлв. Бүрдәһәчнрин келсәр, фестивалин һол күцлнь — дәәчин эрдм болн бөк бәрлдлһ тархасн деерән, баһчудт эрүл-дорул кевәр бәәх авьяс өглһн болжана.
Тхәквондо зер-зев угаһар бийән харслһна эв-арһ. Иим дәәчин эрдм мана танһчд йирн негдгч жиләс авн делгрлт авчана. Хойр минһн йисдгч жиләс авн мана спортсменмүд Әрәсән хамцу командын көрнгин ханьд оржана. Диана Катаева корейин дәәчин эрдмәр цугәрәсән болн нарта-делкән марһасин дииләч болн призер. Иим спортар арвн жилдән дамшлтан өөдлүлжәнә. Эн жилин ашар танһчин тхәквондон спортсменмүд дунд хамгин сән игиж тоолгдв.
Тхәквондон федерацин хамгин сән гисн спортсменк Дина Катаеван келсәр, ода дарани марһанд сән белдвр кех кергтә. Әрәсән марһанд орлцад, түрүн орм эзлх зура бәәнә. Эн эв-арһин секцд экнь авч ирв. Иим бөк бәрлдлһн күн зөрмг болхд туслна, күн дигтә-дарата болна. Тхәквондо йир таасгдна.
Тхәквондон Әрәсән хамцу командын тренер Анжела Демкина келсәр, дәәчин эрдм болн спорт мана танһчд делгрлт авхла эннь мана өдгә цагин баһчудт кергт. Иим эв-арһин нилчәр бийән харсж авсн деерән, көвүд-күүкд эрүл-дорул кевәр бәәлһнә авьяс бәрх.
Хальмгин тхәквондон федерацин президент Анжела Демкина келсәр, мана танһчд федерацин үзмж сән.
Жил ирвәс дәәчин эрдмәр олн улс соньмсдг болжана. Энүнд спортсмнмүд болн иим спорт дурта улсин то ил герч болжана. Тер тоод олнд нертә эв-арһ болн ик делглрт авад уга бөк бәрлдлһн бас делгрлт авчана. Тедн дунд грэплинг болн кэндо. Грэплингин эв-арһд бөк бәрлдлһнә эв-арһ олзлгдна. Кэндо болхла фехтовальн эрдм олзлж, самурайск техникас туужан эклжәнә.
Эн саам бичкн спортсменмүд концертн залд билг-эрдмән үзүлв. Энүнә йовдт эдн дөрлдсн деерән, олн-зүсн эв-арһ үзүлв. Эннь йоста спортивн нәр-нааднд хүврәд, давжах спортивн жилин аш диглһн болв.
Көгжмин айсд олн-зүсн школын спортсменмүд билг-эрдмән дамшлтан үзүләд, хәләһәчнриг байрлулв.
Елена Алексенко, Хавтхна Анатолий
