Чкаловский селәнә әмтн хуучн интернатд ясад, бичкдүдин сад секхәр саната
Эн жил Көтчнрә района Чкаловский селәнә бәәрн әмтн бәәх хуучн интернатын бәәриг ясвр кеһәд бичкдүдин сад секхәр саната. Интернатын тосхлт дегд хуучн биш, олн әмтнә дөнгәр ирх сурһулин жилд нааран эк эцкнр эврәннь бичкдүдән авч ирх.
Өдр болһн нааран Чкаловский селәнә муниципальн бүрдәчин ахлач Амуна Токтан ирнә. Эн хуучн интернатын бәәрнд бичкдүдин сад секх санан селәнә школын багшнрт ирв. Ахлачин тоолврар эн сән керг болжана. Интернатын эрсмүд хуучн биш, ясврин көдлмш кеснә хөөн олн жилдән зогсх. Дәәкәд нааран көк түлә орулхла, шин терз тәвхлә энд бәәх бичкдүдт дулан болх. Эн ясврин көдлмш мөнгн кергтә, тегәд эн мөнгиг селәнә фермермүд болн Көтчнрә района муниципальн бүрдәцин ахлачнр йилһж дөнгән күргх. Эн кергиг ахр цагин болзлгт бидн күцәх санатавидн гид мадн селәнә ахлач келв. Тер юнгад гихлә эндр селәнд олн үртә орк бүлмүд бәәнә, бичкдүд гертән сууна, зәрм бичкдүдиг ээж аавнр хәләнә, болв ээж аав уга болхла баһчуд көдлго бичкдүдән хәләнә. Эн керг күцәгдхлә олн жилдән көдлмш уга суусн сурһмжлачнр көдлмшәр теткгдх. Эндр Тогтан Амунова цуг кергтә цаас белдв, эн документиг ахлачнр хәләһәд эврәннь ухан тоолвран бас орулв. Иргчдән дәкәд хойр тосхлтын обьект шинрүлгдх, эннь селәнә клуб болн больниц. Селәнә бәәрн улсин келсәр дамшлта ахлачин һардврт мана керг күцәгдх, мана селән жил ирвәс улм сәәхргдх.
Селәнә баһчуд эндр өдр эврәннь сул цаган школын уул деер бәәх заал цаган давулна, болв эн бәәрн йир бичкн. Селәнд клуб көдлхлә мана баһчуд балһсндан суулгон амрллһна өдрмүдт дангин гертән ирәд эк эцкнртән малы нард йовад, дөнгән күргәд, селәнә делгрллтд нилчән күргх, асхар сул цаган чигн сергмжтәһәр давулх, ни негн бәәх.
Валентина Чучеева, Николай Хулхачиев
