Цергә офицермудас баһчуд үлгүр — үзмж авчана

Баһчудт цергчнр үлгүр — үзмж болжана. Лаганя школмудт хойр жил дарандан хойр пограничн класс көдлжәнә. Эн цагин эргцд көвүд ик дааврта болв, диг-дараһан ясв, сурһулян чигн сәәнәр сурчана гиж эднә багшнр келнә. Юнгад гихлә, ода ФСБ-н пограничн заллтин көдләчнр баһчудт сән үлгүр-үзмж болжана. Нәәмдгч классин сурһульчнр погранзастад дару-дарунь гиичд ирнә. Энд баһчудын төлә шишлнг цергә сурһуль болна.

Террористнр генткн заставд өөрдж ирәд, бууһас хав. Иим бандитнрин багин һол күцлнь — блокпост авх төр тәвж. Болв цергә әмтн саг бәәһәд, агчмин зуур эдниг бәрж авцхав. Пограничникүд эврә кергән сәәнәр медсн деерән, шишлнг сурһульта нохаста хамдан ни-негн көдләд, ахр болзгт дәврсн улсас зер-зевин булаж авад, бәрәнд авцхав.

Нег сәнь эннь цергә көдләчнрин сурһулин кем болв. Иргчдән пограничникүдин эрдм дасх бичкдүдин төлә школьн программд зер-зев сәәнәр олзлһна дисциплин орна. Нәәмдгч классин сурһульчнр Калашниковин автоматыг нег минутын эргцд цуцад цуглулж авч чадна.

Иим ик сурһулин программин хөөн кеер үдин хот эдниг күләжәж. Цергә палаткд баһчудыг йосн салдсин хашар тоожана. Сурһульчнр биш, эднә багшнр чигн иим бүлән кеәвр тосснд үүмәд бәәв.

Лаганя негдгч школын директор Татьяна Соломенцеван келсәр, бичкдүд урдкас йир ик дааврта болв, погранзаставин цергчнр эднд сән үлгүр-үзмж болжана. Эднәс үлгүр авад, өсхләрн бас иим чанһ-чиирг болх саната. Оданас авн эдн бөдүн улсин жирлһин таалд дасчана. Лаганя дөрвдгч школын директор Мергн Очировин келсәр, цергә улсла иим хәрлцән ик кезәнәс авн батрулгдв. Школд цергә нег класс төгсәсн баһчуд бәәнә. Эднә зәрмнь цергә училишд орад сурчана, талдан баһчуд цергә академьд чигн орж чадв.

Дорас өчж йовх баһчудын сурһмжин төриг офицермуд ода һол төр гиж тоолжана, юнгад гихлә, өдгә цагин сурһульчнр мана орн-нутгин харсх зөвтә. Ода болхла межән метр болһн энд церглжәх пограничникүдин чанһ бүртклһнд бәәнә.

Эн заһсчнрин документнь чик болж һарв. Болв жил ирвәс Көк тенгст заһсн баһрад йовна. Нег сардан әрә гиж һурвн тонн берш заһс бәрж болна. Тегәд чигн ода квот авсн предприятьмуд заһс бәрлһнә көдлмшиг күцәхдән икәр дурлжахш. Онц темдглхд, эн өдр мана үүдәчг баг болн пограничникүд зака эвдсн нег чигн кү бәрж авсн уга. Пограничникүдин келсәр, эн жил эднә участкт бачм чинртә йовдл учрсн уга.

Хальмг танһчар болн Астраханск областяр Әрәсән ФСБ-н пограничн заллтин Лагань балһсна әнгин ахлач Марат Усмановин келсәр, ода Лаганя районд браконьерствин йовдлмудын то зөвәр баһрв. Эннь полицин болн бәәрн муниципалитетин хамцу үүлдврин сән аш болжана. Болв иим цергин һол күцлнь — мана төрскнә межә харсад, зака эвдсн улсиг бәрж авх төр тәвгджәнә. Нег үлү, Кавказ эндәс өөрхн, усна аһуд бултжах террористнриг илткж авх кергтә.

Өдр болһн Көк тенгст пограничникүдин кесг керм һарч харул күцәнә. Цергчнр тенгсәр йовсн керм болниг ик оньган өгч хәләнә. Иим кевәр эс церглхлә, Әрәсән межәг бандитнр давж һархар седх.

Арстана Светлана, Ирчин Алексей