Целинн района эврә дурар үүлддг коллективмуд аттестацд орв
Целинн района эврә дурар үүлддг зурһан коллектив олн-әмтнә нерән иткүлв. Давсн амрлһна өдрмүдт ансамбльмудын аттестац болв. Артистнр жюрин оньгт болн олн әмтнд хамгин сән концертн программан үзүлв. Амрлһна өдр болв чигн эврәннь нег һазра артистнриг дөннхәр бәәрн администрацин толһач Виктор Джанджиев ирв.
Целинн районд бахмж кех үүдәгч коллективмуд олн. Келхд, Вознесеновка селәнә “Сударушка” ансамблин орлцачнр бурановск эмгчүдәс хоцршго. Һучн жилин хооран тогтагдсн “Сударушка” ансамбль танһчин болн цугәрәсән марһасин лауретын нер кесг дкәж зүүлә. Сүл давсн концертин хөөн ансамбль олн-әмтнә коллективин нер зүүв.
“Сударушка” ансамблин орлцач Тамара Кизимирован келсәр, дурта көдлмш йоста эрдмд хүврв. Ансамбльд тәвн доладчг жилсәа вн орлцжана. Мадниг олн улс ирж хәләнә. Нег үлү алдр Диилврин өдр майин йиснд дегд олн әмтн концертд ирнә.
Концертд артистнр олн-зүсн халхар билг-эрдмән үзүлв. Эдн хальмг улсин, орсин, хазгудын ду дуулж өгв. Эврә дурар үүлддг коллективин орцлачнр сән билг-эрдмән үзүлсн деерән, ке-сәәхн сценическ хувцар олн улсиг байрлулв. Келхд ансамблин орцлачнр иим хувц-хунриг эврәннь һарарн уйж. Ансамблин орлцачнрин олн-зүсн билг-эрдм дундас жанһрч Олег Калыковин эрдмиг онц темдглх кергтә. Домбр цокад, хальмг улсин алдр дуулвриг йир сәәнәр дуулдган үзүлв.
Келхд, хальмг улсин амн үгин зөөр хадһлж йовх күн олн жилдән Шавдл нертә олн —әмтнә дууһин ансамльин ханьд оржана. Шавдл гисн үгиг орс келнд стройная пальма гиж орчулж болх. Иим нер Бумбин орна һардач Жанһрин сәәхн авал зүүж йовсмн. Олег Калыковин аваль Ольга ансамбльд олн жилдән хореограф болж көдлсмн.
Эн өдр района кесг коллективмуд эврәннь билг-эрдмән иткүлхәр ирв. Мана танһчин әмтн үүдәлтд дурта гиж бат итклтәһәр келж болх. Танһчин үүдәгч коллектвмудын аттестац эн жилин март сард эклв. Энүнә төлә танһчин эрдм-сурһулин, сойлын болн номин министерств шинжлһнә хүүв тогтав. Эн цагин эргцд Яшкульск, Лаганск, Сарпинск, Баһ Дөрвд. болн Целинн райодын коллективмуд эврәннь нерән иткүлж чадв. Целинн РМО-н администрацин сойлын әнгин һардач Анна Тимофееван келсәр, мана ансамбль Целина района әмтнд сойлын билг-эрдм белглсн деерән, талдан һазрин әмтнд ик баүр үүдәж, хальмг улсин сойлын тугиг ик холд делскжәнә.
Ирчгдән шинхлһнә хүүв дәкәд райодт одх зөвтә. Энүнд талдан райодын үүдәгч коллективмуд аттестацд орх. Эннь ик дааврта болн жанһрта көдлмш. Эднә көдлмшин ашт мана танһчин сойлын бәәдл ямаран болхнь медгдх.
Елена Алексенко, Котина Валерий
