Царцахала ноолда кехин төлә белдвр кегдв
Ода танһчин селәнә эдл-ахун көдләчнрт һол көдлмш дунд царцахала ноолда келһн болн тәрәнә һазриг харсж авлһна төр болжана. Хортнас тәрәнә аһуг харслһна көдлмшиг танһчин эдл-ахус экләд уга. Специалистнрин тааврар, эн жил далн минһн гектар тәрәнә аһу харсж авх кергтә. Энүнә тускар танһчин селәнә эдл-ахун министерствд болсн семинарт келгдв. Энүнд зу һар күн орлцв. Тер тоод Россельхозцутхлнгин элчнр, “Шелково Агрохим” предприятин һардвр болн номтнр ирв. Келхд, эн компань царцахала ноолда кедг хорар эдл-ахусин теткжәнә.
Орловск областьд бәәх “Шелково Агрохим” нертә негдлтин медлд үүлджәх эдл-ахуд ямаран тенгрин бәәдл тогтв чигн, жил болһн буудян сән урһц хураж авна. Компаня һардачин дарук Салис Каракотовин келсәр, эдл-ахуд һазр олзлһна төрт онц оньг өггднә. Тенд олн-зүсн кергтә эв-арһ олзлж көдлжәнә. Тер тоод ямаран культур альд тәрхинь урдаснь ухалж күцәнә, һазр сәәнәр эд-бод кенә, бордврар асрна. Дәкәд болхла докладчик урһмл харслһна төрт ик оньг тусхав. Каракотовин келсәр, энүнә төлә Шелково Агрохим фирмин кеж һарһсн химин препаратмуд икәр олзлгджана.
Компаня һардач Салис Каракотовин келсәр, хойр минһн арвн хойрдгч жилд һан болсн һазрт буудян сән урһ хураж авгдла. Намрин тәрәнә буудя жирн негн центнер өгв, хаврин тәрән дөчн долан центнер, ичмән тәвн тавн центнер өгв.
Энүнә хөөн семинарт орлцачнрт хорта өвснлә болн урһмлын хортнла ноолддг техник болн препаратмуд үзүлв. Россельхозцутхлнгин Хальмгин филиалын һардач Александр Кекешкеевин келсәр, Хальмгт ода “Барс” нертә хор цацдг һурвн техник хулдж авв. Тер мет федеральн мөнгәр давн жилд трактормуд болн ус хадһлдг ик сав хулдж авгдла. Эннь йир сән дөн болв. Нег үлү, эн жил мана танһч дөврн зун тәвн минһн тонн бүүдя хураж авах саната. Агроцерглтин эрлһәр иим хойр техник кеер һарад хортнла ноолджана. Шелково Агрохим компаньла нөкцлт батлж авсна хөөн, тендәс урһмл харсдг сән эв-арһ иржәнә.
Россельхозцутхлнгин Хальмгин филиалын һардач Александр Кекешкевин келсәр, “Шелково Агрохим” компаняьла давсн жилд бооцан батлж авгдла. Эн бооцаһар эдн кергтә хорар танһч теткжәнә. Энүгәр царцахала болн талдан чигн хортнла ноолдж болх. Ода цуг кергтә хорн авч иргдв.
Шинжләчнрнин тоолврар, тәрмр урһмл хархсин төлә иим көдлмшиг кертгә цаг-болзгтнь күцәх кергтә. Эннь ик әәмшгтә царцахала ноолда келһнә көдлмшт бас туслх. Россельхозцутхлнгин специалистнр үвлин-хаврин кемд кесн шинжлтын көдлмшин ашин тускар зәнглв. Муниципалитетмуд болхла энүнәс иштә урһмлын хортнла яһж ноолдхин тускар селвгүд авв. Мана танһчин правительств энүнә төлә эн жил тавн сай арслнг йилһж өгхин тускар эндр медгдв. Россельхозцутхлнгин директорин дарук Дмитрий Говоровин келсәр, иим көдлмш күцәхин төлә регионмудт федеральн цутхлнгас бас дөн ирх.
Хальмгин селәнә эдл-ахун шинжлт кедг институтын әнгин һардач борис Гольдварг келсәр, Әрәсә цаглань сән нөкд болжана. Хорн болн техник бәәнә. Иим кевәр хортнла сәәнәр ноолда кеж болх.
Ода болхла царцаха тархагдсн далн минһн гектарас эндр өдрт хөрн тавн минһн гектарт хорн цацгдв.
Чучян Валентина, Ирчин Алексей
