Бөкнр дииләчән йилһв
Йоста залус спортын м астерин цол зүүхәр ноолдв. Элст балһснд Советск Союзин Герой генерал-полковник Ока Иванович Городовиковин санлд нерәдгдсн герко-римск янзар бөк бәрлдлһнә марһан болв. Энүнд Хальмг танһчин болн Әрәсән Өмн үзгин регионмудын бөкнр орлцв.
Арвн нәәмн наснас ах зун бөк Элст балһснд ирәд, чидлән сөрәд, Әрәсән спортын мастерин цол зүүхәр дөрлдв. Эдн Әрәсән Өмн үзгин нәәмн субьектас ирж дөрлдв. Келхд, Армавир балһснас ирнс спортсмен Олег Алджеев хамгин ах наста болж һарв. Ода эн спортсмен дөчн тавн нас зүүв. Бүрдәһәчнрин келсәр, марһан йир зүткәтә болхнь түрүн ноолданас медгдв.
Марһана ах зарһч, нарта-делкән категорин зурһач Ростов-на-Дону балһснас ирсн Сергей Насевич келсәр, марһанд хөрн тавн күн Өмн үзгин федеарльн округ элчлжәнә. ЮФО-н цуг регионмуд орлцжана. Кабардино-Балкарин болн Ставропольск крайин бөкнр ноолджана. Дөрлдән ик чинртә марһан болв. Энүнд спортын мастермуд, Әрәсән чемпионатын призермуд бәәнә.
Ноолдана завсрт турнирт диилчә бәрх зөвтә Баир Сангаджиев дөрлдәнә тускар эврәннь ухан-тоолврарн хувалцв. Ода Баир греко-римск янзар бөк бәрлдлһнә болн бүс бәрж ноолдлһна Әрәсән хамцу командын гешүн.
Греко-римск янзар бөк бәрлдлһнә болн бү бәрж ноолдлһна Әрәсән хамцу командын гешүн Баир Сангаджиевин келсәр, ода бөкнр йир чидлтә болв. Ноолдхд күнд болж одв. Нег үлү, шин зокалар иим түрүн дөрлдән болжана. Урдк цагас ноолдхд күнд болв.
Тренермуд болхла эн марһанд эврәннь күцлән тәвж шунв. Келхд, өрәл жил хооран иим эв-арһар бөк бәрлдлһнд шин зокал орулгдв. Сольвр олн-зүсн халхар кегдв.
Ар Кавказин федеральн университетин командын ах тренер Ставрополин элч, Әрәсән спортын мастер Игорь Андреевин келсәр, урднь бөкнр күсдундур минутар хойр периодт ноолддг билә. Хашнгар ноолджах бөкнриг засгла харһулна. Эднд ялын балл өггднә. Иим кевәр ноолдан шунмһа кевәр болх зөвтә. Энүнә тускар нарта-делкән бөк бәрлдлһнә федерац бас келнә. Иим зокал ноолдан зүткәтә болхд сән нилчән күргх.
Тер бийнь әрәсән бөкнр тер тоод эн марһана цуг орлцачнр шин зокалыг сән үзмжтәһәр олзлжана. Иим таалд хальмгин спортсменмүд Әрәсән спортын мастерин цол зүүв. Тер тоод тәвн килограммин чиннүрт Сергей Манджиев, тәвн тавн килограммин чиннүрт Эрдни Шактаев иим цол зүүв. Онц темдглхд, Эрдни Шактаев зүткәтә ноолдана ашар Ставрополин бөк, спортын мастер Арой Абрамяниг диилв. Хамгин күнгд зун хөрн килограммин чиннрүт Ростовск областин элч Александр Калинин түрүн орм эзлв. Элст балһснд болсн марһан эн жилин зураһар хамгин сүл дөрлдән болв. Дарук марһан иргч жэилин апрель сард болх.
Хавтхна Элла, Эрнжәнә Эрднь
