Бүс бәрлдәд ноолдлһна марһан Элст балһснд болв
Хальмгудын шин жилд нерәдгдсн мана келн-улсин авьсар бүс бәрлдәд ноолдлһна марһан Элст балһснд болв. Энүнд зу һар күн орлцв. Байрин өдр күн болһн чидлән сөрж чадв.
Иим соньн кевәр бөк бәрлддг әмтнә тоолврар, сүл цагт хальмг улсин уул авьясар бүс бәрлдәд ноолдаһар олн әмтн соньмсдг болв. Тер тоод дала баһчуд иим спортар икәр соньмсжана. Эдн дөрлдәнә йовудт чанһ-чииргән үзүлв. Бүс дәрлдәд ноолдлһн хальмг улсин уул авяьс-зангшал болжана. Иим кевәр ноолддг бөкнр нег-негән эрк биш дал деернь унһахар зүткнә. Иим кевәр вольн янзар бөк бәрлддг Көтчнрә района элч Очир Гаряев диилвр бәрж чадв. Ноолдхд күнд болв гиж эн келнә. Арвн негн жилдән дамшлтан хоршаһад, чадмган үзүлж чадв. Зуг бүс бәрлдәд ноолдлһна спортар шинкн экләд соньмсдг болв. Очир Гаряевин келсәр, өдгә цагт вольн янзар бөк бәрлдлһнд сән үзмж бәрхд йир күн болж одв. Бүс бәрлдәд ноолдлһн шинкн деглргт авчана. Тегәд иим эв-арһ шүүж авлав гиж Очир келнә.
Ик-Буурла района спортсменмүд иим дөрлдәнд ик кезәнәс авн орлцад, сән дамшлт хоршав. Тер бийнь бөкнрин келсәр, һарад ноолдхин өмн эдн цугтан үүмнә. Болв бөк болһн эрк биш диилвр бәрхәр зүткнә.
Танһчин бичкдүдин спортын школын директор Геннадий Левиновин келсәр, иим марһан шинкн экләд бүс бәрлдәд ноолджах баһчуд сән дамшлт болн урмд өгнә. Онц темдглхд, бүс бәрлдәд ноолдлһна таал болн зокал удл уга сольгдх. Энүнд бас эврә учр бәәнә. Спортын школын директор Геннадий Левиновин келсәр, өдгә цагт шин зокал батлж авгджана. Барун Монһлын элчнрлә харһад күүндж. Эдн тенд яһж бөк бәрдлһнә марһан ямаран кевәр болдгин тускар келж өгв. Тенд ноолдана болзг уга. Зуг дал һазрт күрхлә, шүүгдсн темдг болжана. Хальмгт болхла кавказин зокал олзлгджана. Эннь кавказин куреш ноолдан болжана. Тегәд бидн эврәннь авьясан сергәж авх санан бәәнә гиж Левинов келнә.
Келхд, ик кезәнәс авн хальмгин бөкнр эврә зокалар ноолдад дасчксн билә. Урднь иим кевәр олн улс чидлән сөрхдән дурта билә. Тегәд зулын өдр болсн иим марһан уул зангшалд түрүн ишкдл болжана. Дөрлдәнә дииләчнр мөнгнә мөрә шүүж авв, Элстин цутхлнг хурлас белг авцхав. Тер мет гелнгүдәс арша аршалв.
Ээнән Ольга, Дукмана Николай
