Бииһин төрмүдәр конференц цаарандан болжана
Эндр танһчин концертн залд Өөрднр государственн бииһин театрин художественн һардач Петр Надбитовин далн тавн жилин өөнд нерәдгдсн байрин ик концерт болх. Энүнә өмн өдр конференцин орлцачнр хәлхәгдсн төрмүдәр ухан-тоолврарн хувалцв.
Олн-әмтнә би келн-улсин сойлын өвәрц темдг болна. Энүнә тускар конференцин орлцачнр келв. Петр Надбитов үг келх чеерүд ирхлә, эврәннь театрин артистнриг сцен деер һархинь сурв. Эннь йоста мастер-класс болв. Надбитовин тодлсар, “Ишкмдг” биид “Мольжур” олзлх санан орв. Танһчин нертә биич Эмба Манджиев иим шиддрвлә зөвшәрсн уга. Тегәд мольжур бииг түргн кевәр биилх санан орв.
Зурһан настаһасн авн Петр Надбитов хальмг улсин биид улран өгв. Хүрм болсн цагт әмтн яһж биилжәхин шинжлж авад, бийдән улсин билг-эрдм шингәж авдг бәәсмн. Хөөннь хальмг улсин биид цуг арһ-чидлән тусхаж, ода күртл дурта эрдмән хаяд уга. Ут-тоодан тәвн жилдән эн халхар көдлжәнә. Олн-әмтнә дамшлтар түшг кеһәд, бииг өдгәц агин янзар биилх эрдм дасхжана. Энүнә үүдәсн “Туула би”, “Тоһрун”, “Баатрмудын би”, “Чичрдг”, “Дөрвдә тавшур” Әрәсән бииһин искусствин алтн сангд орсмн. Эврән би үүдәхдән йир дурта.
Уральск государственн университетин социальн-гуманитарн номин кафедрин доцент Владимир Биче-оолын келсәр, олн келн-улсин биид әдл янз олж авч болх. Хальмг болн тува улсин биид әдл олн янз бәәнә. Зуг хальмг улс эврә өвәрц би үүдәв.
Петр Надбитовин үүдәвлтиг нарта-делкән ЮНЕСК организац өөдәнәр үнлв. Петр Тимофеевич Хальмг танһчас түрүн болж энүнә гешүн болв. Тер мет “Чичрдг”, “Ишкмдг”, “Дөрвдә тавшур” болн хальмг улсин алдр Жанһр дуулвр ЮНЕСКО-н сойлын зөөрин спискд орулһна тускар седвәр татсн күн болжана. Ода эн төрәр нарта-делкән номтнр күүндвр кежәнә.
Олн-әмтнә би монһл келн-улсин туужин болн сойлын зөөр нерәдлһтә конференцд эн халхар тодрха күүндвр кегджәнә. Мана телекомпань хургин цуг орлцачнрин келсг үгмүд бичж авв. Тер мет “Вести-Калмыкия” программин журналистнр хальмгин түрүн профессиональн балетмейстер Петр Надбитовин тускар фильм белджәнә. Энүг ноябрин нәәмнд мана эфирт хәләж болх.
Ээнән Ольга, Котина Валерий
