Баһ наста өрк-бүлмүдин төлә ЗАГС-т школ көдлжәнә
ЗАГС-ин әнгд баһ наста өрк-бүлин школын дарани сүүр болв. Хөрн жилин туршарт хойр сард нег дәкж бичкдүдиг болн эк-эцкнриг темдглж бичдг һол бәәшнг баһ наста өрк-бүлмүдт болн өрк-бүлән тогтахар седсн баһчудт түрүн күнд-түрү бәәдләс һархд нөкд болжана. Ведомствин көдләчнрин келсәр, эннь сән зангшалд тохрв. Өрк-бүл тогталһн болн энүг хадһлһн бүкл ном болн эрдм болжана. Тегәд дөн авх улс энд оньдин бәәнә.
Эндрк сүүрин һол төрнь — өрк-бүл зуралһна болн эрүл-менд кевәр бәәлһнә туск төр. Энүг күүкд улсин консультацин акушер-гинеколог давулв. Баһ наста улст эмч олн-зүсн гемин тускар, саата күүкд улсин эрүл-менд харлһна болн талдан чигн төрмүдин тускар тодрхаһар келж өгв. Сүүрт орлцачнр дунд Алена болн Артем ик оньган өгч лекц сонсв. Эдн июлин зурһанд хүрмән кехмн. Эднә келсәр, иим сурһуль олз-туста болна, өрк-бүләр бәәхд иим лексц ик дөн болжана. Нег үлү, ода эдн нилх төрхинь күләжәнә.
Артем Черниковин келсәр, иим школмуд кергтә. Баһчуд энүнд олз-туста медрл авад, иргч жирһлд белн болна. Алена Петушенко келсәр, соньн лекц болв. Саата күүкд улс тәмк татж болшгон болн әрк-чаһ уушгон тускар келж өгв.
Лекц сонссн дөчн күн ик оньган өгч эмчин келсиг сонсв, эдниг соньмсулжах сурврмуд өгв. Эн школын бүрдәһәчнрин келсәр, баһ наста өрк-бүлмүдт зөв-йосна, педагогическ, психологическ халхар кергтә медрл өггджәнә. Иим сурһуль баһчудт ик олз-туста болна. Эн күүнә келсәр, иим школ бүрдәснь сән керг. Энүнд олн-зүсн соньн медрл авч болжана. Э көвүнә келсәр, харм төрхд лекцд һанцхарн ирж. Хамдан күүктәһән ирсн болхла сән болх билә. Олз-туста медрл өгчәнә.
ЗАГС-ин ах специалист Елена Донкаеван келсәр, баһ наста өрк-бүлмүдин школын дәкәд нег һол күцлнь — өрк-бүлин уул авьяс зангшал тархалһн болн баһ наста эк-эцкнрин сойлын кемжә өөдлүлһн болжана.
Элстин ЗАГС-ин ах специалист Елена Донкаеван келсәр, зәрм өрк-бүлмүдиг кесг сурврмуд үүмүлнә. Школд сурһулин лекц умшхин төлә юристнр, психологуд, эмчнр ирнә. Иим школ өрк-бүлин чинр өөдлүлһнә, эрүл-менд кевәр бәәлһнә авьяс бәрлһнә төлә бүрдәгдв. Иим сурһуль дассн баһчудын өрк-бүл бат болна.
Баһ наста өрк-бүлин школд ирсн әмтн бийннь төлә соньн болн шин медрл авцхав. Иим медрл эднд жирлһин хаалд кергтә болх. Өрк-бүл гисн зуг хоосн хамдан бәәлһн биш, шуугата хүр келһн биш, өрк-бүл гисн ик дааврта керг гиж баһчуд санхла, энд көдлжәх школ эврәннь күцлдән күрв гиж келж болх.
Ээнән Делгр, Колдан Церн
