Баһ Дөрвдә команд “Алтн Булг” нерәдллһтә нааднд түрүн орм эзлв
Эндр “Алтн Булг” нерәдллһтә наадна дииләчнрин нерд заагдв. Түрүн орм Баһ Дөрвдә команд эзлв.
Танһчин «Алтн Булг» нерәдллһтә нааднд танһчин арвн һурвн районмудас көвүд күүкд орлцв. Зурһан сарин эргцд эн наадна белдллһнә көдлмш давулгдсн билә, март болн апрель сармудт мана телеүзлвр, эрдм сурһулин министерствин специалистнрлә, ик сурһулин багшнрла хамдан наадна зура бичж, баһ наста көвүд күүкдлә харһж билг эрдмнь хәләв. Түрүн девснгд 14 күн орлцв. Эн девснгд болхла районд болн Элст балһснд диилвр бәрсн күүкд көвүд орлцв. Хойрдгч болн һурвдгч девснгд урднь давулгдсн марһаст диилвр бәрсн билгтнр орлцв.
Эн марһана товчлгч девснг танһчин концерт заалд давб. Жүрин гешүдт көвүд күүкд дассн йөрәлмүдән, үлгүрмүдән, даржнгудан айслулж келв, ду дуулж, би чигн биилв. Яшкуль селәнәс даргин келн улсин күүкд күн Альбина Ибрагимова минһн нәәмн зун арвн хойрдгч жилд болсн дәәнд орлцсн хальмг цергчнрин тускар ду дуулв. Эн дууна үгнь, айснь цуг келн улсин санан седклиг, бәәдл жирһлиг үзүлжәнә.
Эн дун нанд йир таасгджана. Тер юнгад гихлә эн дәәнд кесг әмтн орлцад әмән хармнлго, төрскн нүтган харсв.
Цаһан усна селәнә дундын школын арвдгч классин сурһульч Этцен Цеденовин келсәр эндр өдр дорас өсч йовх баһчуд хальмг келән сойлан медхәр седхш. Хальмг келиг баахн эк эцкнр медхш.
Үстин района Эрдниевский селәнәс ирсн Боован Пюрвән үзүлсн билг эрдм жүрин гешүдт таасгдв. Эн марһанд орлцх ик дурн билә.
Мини нәәжнр нанд итксн уга билә.Эндр өдр баһчуд сойлан келән медхәр седхш.Кесгнь эндр өдр унг тохминнь туужан медхш.
Танһчин «Алтн Булг» нерәдллһтә наадн эврә көдлмшән эклв. Эн йовдл хальмг келнә багшнриг байрулна.
Яшкульск гимназин багшин келсәр иим наадн бичкдүдт кергтә, юнгад гихлә эдн энд орлцад хальмг келән авг бәрцән сәәнәр медх.
Эн наад үзсхәр ирсн әмтн ик гидгәр байрлв. Диилвр бәрсн Баһ Дөрвдә команд хальмгин номт профессор Дорж Павловин өөрхн элгн саднас үнтә белг авб. Май сарин арвн нәәмнд мана танһчд Дорж Павловин зун жилин өөниг өргнәр темдглх.
Колдан Наталья, Котина Валерий
