Багшнрин жалв өсжәнә
Эн жилин хаврар Жилин багш нертә марһан болх. Ода педагогическ коллективмудт белдвр кегджәнә. Танһчин эрдм-сурһулин министерствин темдглсәр, жил болһн марһанд орлцх багшнрин то өсәд йовна, нег үлү баһ наста специалистнр иим дөрлдәнд бас орлцжана. Эннь бас учрта. Государствин халхас багшнрт ода цуг халхас дөн күрггджәнә. Эндр өдрт хамгин сән багшнрин жалв арвн тавн минһн арслнг күрчәнә. Тер мет танһчин толһачин даалһврар, баһ наста багшнриг дөннлһнә төлә социальн пакет өггдх.
Элст балһсна классическ гимназин туужин баһ наста багш Вадим Дубров энд удан көдлжәхш. Кубанск университет төгсәснә хөөн нег жилдән Краснодар балһснд багшар көдлв. Болв Хальмг танһчд хәрж ирх дурн күрв. Энүнә келсәр, жалвин кемжән ода сән, тер мет деернь дөнцл мөнг өгчәнә, тер мет баһ наста специалистнриг цуг халхаснь дөннжәнә.
Элстин классическ гимназин туужин багш Вадим Дубровин келсәр, күч-көлснә күцәмжәс иштә жалв өггднә. Кемр иим үзмж сән болхла, жалвин кемжән бас өснә. Эннь көдлмшт урмд өгчәнә. Элстин классическ гимназин профсоюзн комитетин ахлач Инна Тепкееван келсәр, багшнр болн школын талдан чигн көдләчнр көдлмштән сән күцәмж бәрхлә, сән жалв авх. Сар болһн авсн баллар жалвднь немр дөнцл мөнгн өггднә.
Элстин хөрн негдгч школд багшнр дөнцл мөнг өглһнә дамшлтыг ик кезәнәс авн олзлжана. Багшнрин сар болһна көдлмшиг бальн системар үнлжәнә. Олн-зүсн марһаст болн программст олцснь тоод авгдна, сурһульчнрин медрлин кемжән бас тоод орна. Тегәд урмд өгдг мөрә хамгин сән багшнрт сарин ашар өггджәнә. Багшнрин тоолврар, эннь жалвд сән немр болжана. Элстин хөрн негдгч дундун школын эклц классин багш Ирина Головченкон келсәр, бидн болн мана сурһульчнр олн-зүсн марһаст орлцхла, жалвин кемжән ик болна. Эннь көдлмшт урмд өгчәнә. Сүл цагт иим сангин кежән өсв. Ода школын администрац күцәсн ач-тусар жалв өгч чаджана. Сәәнәр көдлхлә, жалв сән болна.
Әрәсән Президентин даалһврас иштә хойр минһн арвн хойрдгч жилин декабрин нег шинәс авн багшнрин дунд жалв танһчин дунд жалвин кемжәнлә әдл болв. Правительствин болн эрдм-сурһулин министерствин дөнгәр ода багшнрт нег дәкж дөнцл мөнгн өггджәнә, селән һазрт һазрин участк өгнә. Хальмгин эрдм-сурһулин министр Лариса Васильеван келсәр, сүл хойр жилд мана танһчд багшнрин жалв тәвн зурһан процентд өсв, хойр минһн арвн негдгч жилд һучн зурһан дундун процентд икдв, давсн жилд хөрн процентд өсв. Иргчдән чигн багшнрнин жалв өсх.
Хальмг танһчин эрдм-сурһулин, сойлын болн номин министр Лариса Васильеван келсәр, дәкәд нег давтад келхлә, Росстатын то-дигәр, давсн жилин декабрь болн эн жилин январь сарин жалв арвн тавн минһ һар арслнг тогтав. Тегәд багшнрин дунд жалв танһчин дунд жалвла әдл болв.
Тер мет эн жил бичкдүдин садмудын көдләчнрин жалв бас өсх. Хойр минһн арвн нәәмдгч жил күртл Хальмг танһчин бюджтен халхин көдләчнрин жалвиг икдүлх төр Хальмгин правительств хаһлх зөвтә.
Бевина Мергн, Хулхачин Николай, Очра Сергей
