Багшнр мергжлтән өөдлүлв
Фортепиано классар мергжлтән өөдлүлһнә сурһуль дассн танһчин искусствин школмудын багшнрт сертификатмуд бәрүлж өггдв. Эднлә байн дамшлтарн Волгоградск консерваторин профессор Виктор Лесенко хувалцв. Эн жил иим сурһульд тәвн долан багш орлцв.
Багшнр эн саамд сурһульчнр болж көдлв. Зәрм орлцачнрин төлә иим мастер-класс йоста эрдмин шүүвр болв. Тегәд чигн Волгоградск консерваторин професоор Виктор Лесенкон селвгүдиг ик оньган өгч сонсжана. Иим сурһуль бүрдәж давулһн энд сән зангшалд тохрв. Искусствин колледжин директор Любовь Горяеван келсәр, багшнрт иим сурһуль олз-туста болна.
Колледжин директор Любовь Горяеван келсәр, шин цаг шин көдлмшин таал некжәнә. Сурһулин шин эв-арһ олзлж кергтә. Багшнрин төлә цуг кергтә таал бүрдхәр зүткжәнәвидн. Багшнр шин эв-арһла таньлдх зөвтә.
Виктор Лесенко эн өдрмүдт эврәннь энкр көгжмин училишд мастер-классмуд өгв. Жирн дөрвдгч жилд Саратовск консерваторь төгсәснә хөөн хальмг танһчд ирәд көдлсмн. Ода профессорин цол зүүһәд, байн дамшлтарн хувалцжана, оютнр болһна билг-эрдмин делгрүлхәр зүткж көдлжәнә. Полина Шамхалова дөрвн жилдән фортепиано зевсгд нааддг эрдм дасжана. Ик дамшлтта багшнрас сурһуль авснь ик байрта йовадл гиж тоолжана. Лесенкон келсәр, шинкн сурһуль дасжах пианистнр болн багшнр энүг байрлулв. Болв хамгин әсн көгжмчиг йилһж келсн уга.
Профессор Виктор Лесенко келсәр, багшнрт дамшлт хоршахд иим сурһуль сән нилчән күргх. Багшнрт кергтә сурһуль өгх кергтә.
Эрдм-сурһулин чинрт шин некврмүд тәвгджәнә. Тер тоод көгжмин школмудт техническ халхар сән тетквр кергтә. Ода иим учрежденьд зевсгүд уга, сурһулин классмуд баһ. Иим күнд бәәдл нурһлж селән һазрт тогтв. Лилия Манжеева Көтчнрә районас ирв. Фортепиано зевсгд наадх баһчуд дала. Зуг цуг бичкдүдиг школд орулж авч болжахш. Тегәд энүнд марһана шүүвр болна.
Лилия Манжееван келсәр, олн-зүсн сурһулин заведеньд авсн медрлән тодлх кергтә болв. Бах, Вивальди композитормудын көгжм тас талдан халхаснь сонсвидн. Шин цаг тас талданар көдлх неквр тәвжәнә.
Нег долан хонг болад дууһин багшнрин төлә мастер-классмуд болх. Шин жилд болхла дамшлтта багшнр селәнә сойлын гермүдин эврә дурар үүлддг бииһин коллективмудын һардачнрин төлә сурһуль бүрдәж давулх.
Ээнән Ольга, Очра Сергей
