Аршан Булг селәнә улс уудг уста болв
Уудг усн — гер болһнд. Целинн района Аршан Булг селәнә улст ик байр учрв. Селәнә социальн делгрлтин федеральн программар усна сурвлжн селәнд тосхгдв. Хойр минһн доладгч жилд Аршан Булг селән селәнә аһун бат делгрлтин федеральн программд орсмн.
Ода поселкин цуг хаалһс малтгдад нүкн болв. Энд өдгә цагт усна сурвлжна турвас тәвгдх. Уд луга турваһар уудг усн селәнә улст ирх. Мулаевихна өрк-бүл хамгин түрүнд гертән ус орулж авв. Тамара Бадмаевна болн Канур Наминович Аршан Булг селәнд һучн жилдән бәәнә. Уудг усг гертнь орж ирх гиж санжасн уга бәәж.
Аршан Булг селәнә бәәрн күүкд күн Тамара Мулаеван келсәр, мана герт ванн бәәнә. Ода бийән уһадг арһ бәәнә. Усна цуг систем көдлжәнә. Халун усн чигн бәәнә.
Вера Комлаеван герт бас уудг усн ирв. Ода күүкд күүнә келсәр, бийән уһадг хора ясж шинрүлжәнә. Эннь байрта керг болжана.
Аршан Булг селәнә бәәрн күүкд күн Вера Комлаеван келсәр, ода цуг коммуникац орулгдв. Балһсна улсла әдл бәәцин цуг таал бүрдәгдв.
Хойр минһн доладгч жилд Целинн района Аршан Булг селән селәнә аһун бат делгрлт нертә федеральн программд орв. Селәнә администрацд тер дарунь проектн-сметн документац экләд белдв гиж селәнә муниципальн бүрдәцин ахлач Борис Чанчаев келнә. Давсн зун жилин далжгч жилмүд селәнд усн бәәсмн. Тиигхд уульнц болһн эврә колонк билә. Болв турвас хуучрад зеврәд, эвдрв. Тегәд усна суврлжиг шинрүлх төр босв.
Аршан Булг СМО-н администрацин толһач Борис Чанчаевин келсәр, хойр минһн арвдгч жиләс авн усна сурвлж экләд тосхв. Ут-тоодан арвн нәәмн сай йисн зун минһн арслнг һарв. Энүнәс хойр сай арслнг танһчин бюджет йилһж өгв. Эн жилин намрар уудг усн селәнә улсин цуг гермүдт орж ирх.
Ода селәнә улсин бәәдл-жирһл ясрв. Ода санамр мал өскж болх, бичкн сад-һаруд тәрж болжана гиж бәәрн улс келнә. Уудн усн эздүдин гермүдт ирсн деерән, социальн обьектмудт бас орулгдв. “Байр” нертә бичкдүдин садт усна төр хаһлгдв. Эн өдрмүдт дошкольн учрежденя көдләчнр эврәннь чидләрн ясврин көдмш күцәжәнә, сантехникүд дула өглһнә систем ясж шинрүлжәнә.
Сурһмжлач Ирина Кукаеван келсәр, жил ирвәс бичкдүдин садт оржах көвүд-күүкдин то өсәд йовна. Ясврин хөөн хойрдгч баг секгдх. Селәнә улсин бәәцин тал ясрнас көлтә, энд бәхәсн улсин седкл байрар дүүрв.
Баира Петрова, Хавтхна Анатолий
