Апрель сарин 10–д “Теегин Сувсн” сәәхләсин марһан болх

Хальмг Танһчд хойрдад теегин сувсиг шүүж авх. Эн марһана аш Элст балһснд апрель сарин 10 болх, эн марһанд эндр өдр арвн зурһанас авн хөрн хойр нас күртл нәәмн күүкд орлцв. Эн өдрмүдт апрель сард болх марһанд белдвр кежәнә.

Хойр жил дарандан мана Хальмг Танһчд «Теегин Сувсн» нерәдллһтә марһанд сәәхн күүкиг шүүж авчана. Эн марһана бүрдәһәчнрин келсәр һурвн жил хооран иим марһа бүрдәх санан ирсн билә.Эн жилин марһан дигтә күүкд улсин сән өдрлә ирлцв. Эндрк марһана һол төр хальмгуд 1812 жилд болсн дәәнд орлцлһн.Энүнд күүкн болһн эн төрәр соньн эссе бичх зөвтә билә. Келхд, Баяна Кикеева Хошуда хурлын тускар бичв.Эн күнд төрин тускар йир күнд болв гиж маднд Баяна Кикеева келж өгв.

Нанла хамдан гүн ухата, билг эрдмтә күүкд дөрлдв. Эн марһанд би диилвр бәрх санатав гиж Баина келв.

Орлцач болһн олн зүсн марһаст орлцх зөвтә. Жүрин гешүдт ханьд хуралын депутатнр, хальмг танһчин правительствин ахлачнр, сойлын болн искусствин үүлдәчнр орлцжана. Хамгин түрүнд эдн билг эрдмтә, гүн ухата, эстетическ сурһульта күүкиг шүүж авх зөвтә. Дәкәд болхлаг энүнд күүкд хальмг кел, авьяс заншалан сәәнәр меддгән, хальмг бүшмүд яһж өмсдгнь үзүлх зөвтә.

Даалһр дегд күнд биш, цуһар бидн эн өдрмүдт невчкн әәмшгтә бәәнәвидн.Юнгад гихләг орлцач болһн диилвр бәрх сана зүүжәнә. Цуг эн даалһвриг сән аштаһар күцәхин керг дала соньн материал дегтр умш кергтә болжана. Бүрдәһәчнрин ухан тоолврар хамгин түрүнд эн билгтә ухата күүкдиг танилдулхн, үүрлһн болжана.

Эн марһана бүрдәһәч Татьяна Милованован келсәр эндр өдр хамдан ни негн кевәр көдлхлә ашнь сән болх зөвтә. Нәәмн күүкдәс хамгин сәәнинь йилһж авх йир күнд болх, юнгад гихлә эн жилд орлцчах цуг күүкд йир билгтә.

Кермен Санкуева, Валерий Котинов