“Алтн дун” нертә марһан төгсв

Элст балһснд сурһульчнр болн оютнр дунд болсн «Алтн дун» нертә дууна марһана товчлгч девсң давв. Энүнә орлцачнр һурвн насни багд хувагдсн билә. Дииләчнр хойр номинацар йилһрв: эннь соло болн вокальн ансамбль.

Кулинарн уичлишин хойрдгч курсын оют Нарн Егоров Дмитрий Шараевин бичсн “Үвлин ду” дуулж өгв. Нарна келсәр, марһанд белдвр кехд күнд болв. Юнгад гихлә хальмг кел мууһар меддг баһчудт иим дөрлдәнд белдхд жанһрта болна. Кулинарн училишин оют Нарн Егоровин келсәр, эн дуунд гүн учр-утхта болн сәәхн үгмүд бәәнә. Белдвр кехд күнд болв. Болв цуг арһ-чидлән агсж, олн улст дууһан тусхаж чадв.

Онц ду дуулһан номинацд сценд түрүн болж тавдгч классин сурһульч Анна Болдырева һарв. Бичкн күүкн Аркадий Манджиевин үүдәсн “Цаһан вальс” жюрин болн олн улсин оньгт тусхав. Марһанд белдвр кехд хамдан сурчасн көвүд-күүкд нөкд болв.

Сурһульч Анна Болдыреван келсәр, сцен деер һархин өмн дегд икәр үүмсн уга. Энүг хамдан сурчасн көвүд-күүк эк-эцкнь болн элгн-саднь дөннхәр ирж.

Максим Очировин билг-эрдмиг олн улс байрлж тосв. Энүнә дуулсн “Ээждән” нертә дун әмтнд икәр таасгдв.

Ке-сәәхн дууна учр-утхинь көвүн олнд күргж медүлв. Максимин келсәр, эн дун хамгин дурта дун болжана. Максим Очировин келсәр, эн дууг экдән болн ээждән нерәдв. Залд экнь сууж. Энүнд дун таасгдв. Түрүн болж экдән иим ду дуулж өгв.

Марһана шүүврин девснг һурвн долан хонгтан болв. Жюрид дииләчнриг йилһж авхд күнд болад бәәв. Жирн орлцачас зуг арвн нәәмн күн товчлгч дөрлдәнд орлцх зөв авв. Жюрин ахлач Вячеслав Убушиевин келсәр, хамгин түрүн жюрин гешүд баһчуд яһж төрскн келнә меддгиньтоод авв.

Хальмгин ачта артист Вячеслав Убушиевин келсәр, хамгин билгтә болн сән дуучиг йилһж авх гиж санжана. Хальмг кел яһж меддгинь тоод авсн деерән, көгжм яһж олзлдгнь бас шинжлгдх.

Марһана бүрдәһәчнрин келсәр, дөрлдәнә һол күцлнь — баһчуд хальмг келән сәәнәр дасх төр тәвгджәнә. Алтн дун нертә хотл балһсна марһана нилчәр дорас өсж йовх баһчудыг эврәннь келн-улсин уул авьяс зангшал сойл медх күцл тәвгджәнә.

«Алтн дун” нертә Элст балһсна марһана дииләчнр дипломар болн үнтә мөрәһәр ачлгдв.

Ээнән Делгр, Хавтхна Анатолий