Алексей Орлов Приютненск районд одв
Хальмг танһчин толһач Алексей Орлов Приютненск районд көдлмшин кергәр одв. Эн саамд селәнә сойлын гермүдт одв, бичкдүдин садмудын көдлмшлә таньлдв, больницд эмчнрлә харһлт кев. Тер мет районд Алексей Орлов малчнрин хошмудт күрв.
Хальмг танһчин толһач Алексей Орлов районд одсн кемд хамгин түрүнд Үлдчн поселкд одв. Ирсн идаруһан делегац селәнә сойлын гер хәләв. Одахн энд автономн дула өглһнә систем углж тәвгдв. Района толһач Иван Кравченкон келсәр, иим көдлмш олн-зүсн бюджетас негдәд өгсн мөнгәр кегдв. Танһчин болн района хазнас хойр зун арвн таваһад минһн арслнг йилһж өггдсмн. Урднь сойлын герт дула өглһнә систем тас уга бәәж. Тер мет сойлын гер дотр ясврин көдлмш кехин төлә мөнг йилһж өгхән района толһач медүлв. Селәнә бәәрн сойлын бәәшнг танһчитн толһачиг соньмсулв. Өвәрц архитектурта гер үзчкәд Орлов өврв. Бәәрн улсин келсәр, сойлын гериг далн һурвдгч жилд тосхж. Тер цагас авн герт нег чигн дәкж капитальн ясвр кегдәд уга. Хойр минһн арвн дөрвдгч жиләс авн эн обьект танһчин бюджетин теткврт орулгдх, Ясврин көдлмш эклсн цагт сойлын бәәшгнд Алексей Орлов ирәд, көдлмшин йовудыг бүрткх саната.
Района больницд одсн кемд танһчин толһач ор сольх даалһвр өгв. Приютненск района цутхлнг больницд танһчин ахлачиг эрүл-менд харлһна болн соицальн делгрлтин министр Владимир Шовунов тосв. Больницин ах эмчин келсәр, эрүл-менд халх шинрүлһнә федеральн программар июнь сарин чилгчәр больниц шин өдгә цагин некврлә ирлцәтә рентген аппаратар теткгдв.
“Тюльпан” нертә дошкольн учрежденя бичкдүд Алексей Орлов нааран ирсн кемд һаза йовсн бәәж. Садын һардач Галина Еременко келсәр, ода арвн багд хойр зун көвүн-күүкн оржана. Садын көдләчнр шин эв-арһар көдлхәр шунжана. Алексйе Орлов бичкдүдлә харһад күүндв. Эдн танһчин толһачин сурврмудт хәрү өгв.
Негдгч тойгта Приютненск дундын школын директор Ольга Медведева ясврин көдлмшин тускар Алексей Орловд келж өгв. Ода энд автономн дула өглһнә систем углж тәвлһнә төлә белдврин көдлмш кегджәнә.
Приютненск школын директор Ольга Медведева келсәр, ясврин көдлмшиг района бюджетин мөнгәр кежәнә. Давсн жилд терз-үүд сольв. Эн жил автономн дула өглһнә систем углж тәвгджәнә.
Эрүл-менд харлһна төрәр хаһлх хурц төрмүдин тускар района цутхлнг больницин болн талдан чигн эмнүлин учрежденьсин көдләчнрлә болсн харһлтд кегдв.
Района эмчнр толһачд олн сурврмуд өгв. Үлгүрнь, поликлиникин профкомин ахлач Александр Иванов ЖКХ-н төрәр сурвр өгв.
Хирург Джамиль Ульбиев болхла ах эмчин автомобильд кондиционер тәвхин тускар келв. Харһлтд орлцсн министр Владимир Шовунов эн төр хаһлхан медүлв. Песчаный селәнә медсестра Дукра района толһач Иван Кравченко эврәннь өгсн үгән эс күцәжәхин тускар тодлж келв. Селәнд хаалһс му, сойлын герт дулан уга, спортзал хуучрад эдлврәс һарв. Энүнә тускар РМО-н толһач хәрү өгв.
Районд йисн школ бәәнә. Йисн спортзалас һурвн залд ясвр кех кергтә. Салькна күчәр көдлдг станцин тосхачнр мөнгнә нөкд болх зөвтә.
Приютное селән жил ирвәс делгрлт авад, кеерүлгджәнә. Цевр-цер уульнцс нүд байрлулна. Һурвн жил хооран СМО уульнцс болн гермүд цеврж кеерүлһнә марһан зарлв. Анацкийн нертә уульнцин әмтн бичкдүдин плошадк тосхад диитлвр бәрв.
Приютненск СМО-н толһач Александр Лютовин келсәр, марһан жил болһн болна. Олн патьрта гермүд дунд, онц эздүдин гермүд дунд, хамгин цевр-уульнц дунд марһан кегднә. Анацкийн нертә уульнцин әмтн һучн минһн арслнг мөрә авв.
Аштнь Алексей Орлов “Уралан” нертә агрофирмд одв. Эн тохма малын предприять мана танһчд нүүрлгч орм эзлжәнә. Приютненск районд одсна ашин тускар Алексей Орлов иигж келв.
“Уралан” нертә агрофирмин продукц хулдлһна халхар боомтг учржахш. Энд өсксн малын чинр хамгин сән тохма мал болжана. Цаарандан чигн иим фирмс делгрүлһнә төр хаһлх зура бәәнә.
Батан Санжирма, Котина Валерий
