Афганистана дәәнд церглж йовсн улсин санлд нерәдгдсн турнир
Элст балһсна 17 тойгта школын уул деер Афганистанд болсн дәәнд цергәд йовсн әмнәсн хаһцсн Сергей Громовин санлд нерәдгдсн мини футболн турнир болжана. Эн турнирт балһсна школмудын арвн һар командс орлцж дөрлджәнә. Негдгч орм авсн командын нерн бембя өдр медж болхмн.
Жил болһн Афганистанас церг һарһсна өөнд болн эн дәәлдәнд орлцсн церчнрт нерәдгдсн олн зүсн керг үүлдврмүд давна. Афганистанд болсн дәәнд арвн тавн минһн мана салдснр әмнәсн хаһцв. Эднәс Тавн зунь хальмг һазра көвүд бәәсмн. Тедн дунд Сергей Громов йовсмн. Энүнә санлд нерәдсн Мини футболн турнир сән авьяст тохрв, долан жил дарандан давулгдна. Минһн йисн зун далн тавдгч жилд бичкн көвүн Сергей негдгч класст орв, сурһулян йилһән сәәнәр сурад, сурмжин заагт спортивн наад наадхдан дурта. Школд сурһуль сурч йовсн нәәжнрләһән хамдан кесг жилдән футбол наадг билә. Бичкн цагасн авн иим нааднд йир дурта. Олн зүсн спортивн марһаст орлцад школыннь нер харсдг бәәсмн. Негдгч классас авн арвдгч класс күртл шунмһа кевәр школын бәәдл жирһлд орлцла. Мини футбольн турнирн ах зарһч Валентин Улановин келсәр йир номһн тогтун көвүн билә, дангин олн әмтнд дөн нөкдән күргд бәәсмн. Минһн йисн зун найн дөрвдгч жилд әәрмд церглхәр йовв. hурвн жил давад октябрин һучн негнд Афганистанд болсн аврлт уга дәәлдәнд әмнәсн хаһцв. Мини футбольн турнирн ах зарһч Улановин тоолврар, футбол наадн олн-зүсн наста болн эрдмтә улсиг негдүлнә дәкәд жил болһн эн марһанд орлцсн баһчудын тонь өсәд йовна.
Турнирт орлцсн бичкдүд тер һашута дәәнә цагиг дотран санж марһв. Элст балһсна аврн доладгч школын команд негдгч минутас авн диилвр бәрв.Давсн жилд негдгч орм арвн нәәдгч школын команд авв. Футбольн дөрлдәнд орлцсн баһчуд сән дамшлтан үзүлв. Энүнд эдн тохнята белдвр кесән медүлв. Эдниг үнтә мөрәһәр болн талдан чигн ачлврар ачлх шиидвр авгдсмн. Тегәд чигн баһчуд тренеран һундашгон төләд, диилвр бәрхәр зүткв. Иим дөрлдән бичкдүдт сән дамшлт өгнә, эдн чанһ-чиирг болна, спортын эрдмән гүүдүлнә. Олн әмтнә тоолврар, дамшлт хоршахин төлә кергтә таал бүрдәх кергтә. Тиигхлә уйн наста спортсменмүд сән үзмж бәрж чадх. Футбольн турнир йир зүткәтә болв. Иим марһанд ветеранмуд баһ цагтан авсн дамшлтан үзүлнә. Хамгин сән футболистнр болн призермуд белгүдәр болн мөрәһәр ачлгдх. Дииләчд кубок бәрүлж өггдх.
Ээнән Делгр, Очра Сергей
